اسرائیل نینگ غزه گه قره تیلگن هجوملری دوام ایتماقده

اسرائیل نینگ, غزه نواری گه قره تیلگن اوزلوکسیز هجوملری گه 24 کون تولدی.  اوشبو هجوم لر عاقبتیده 8 مینگ دن آرتیق کیشی حیاتینی یوقاترایکن, 20 مینگ دن آرتیق کیشی ایسه یره لندی. 

کسلخانه لر نی هم اوریاتگن اسرائیل اردوسی غزه ده گی القدس  و اندونزیا کسلخانه سی یقینی گه راکت هجومی اویوشتیردی.  اسرائیل اردوسی القدس کسلخانه سینی اوره دیگن لیگی نی بیلدیریب تهدید ایتماقده. 

توناون کیچه اویوشتیریلگن و اوی لر گه ضرر ییتکزیلگن هجوم لرده بعضی کیشی لرنینگ حیاتینی یوقاتگن لیگی و یره لنگن لیگی بیلدیریلماقده. 

اسرائیل نینگ هجوملری غزه ده گی تورکیه- فلسطین دوستلیک کسلخانه سی گه هم ضرر ییتکزدی. 

خوددی شوو کسلخانه نینگ سرطان کسل لری اوچون بیرته گینه مرکز ایکن لیگینی بیلدیرگن کسلخانه باشلیغی, مذکور کسلخانه نینگ اسره لیب قالینیشی اوچون تورکیه دن یاردم طلب ایتدی. 

عینی دمده غزه ده نشرات آلیب باریاتگن الاقصی تلویزیونی, اسرائیل نینگ هجوملریده آق فسفور بمبی دن فایده له نیاتگن لیگینی بیلدیردی.

اسرائیل اردوسی 7- اوکتوبر دن بیری غزه ده 200 دن آرتیق اوی نی بمباردمان قیلدی.  80 حکومت اداره سی, 47 مسجد, 3 کلیسا و 203 مکتب اسرائیل تامانیدن بمباردمان قیلیندی. 12 کسلخانه بیلن 32 ساغلیق نی سقلش مرکزی اسرائیل نینگ هجوملری عاقبتیده فایده له نیله آلمه یدیگن بیر وضعیت گه کیلدی. 

غزه نواری گه آز بیر مقدارده بشری یاردم ییتیب بارماقده.  رفح چیگره دروازه سیدن ینه 24 موتر یاردم موادی غزه گه ییتیب باردی.  شونده ی قیلیب 7- اوکتوبر کونی دن بیری غزه گه 118 موتر یاردم ییتیب بارگن بولدی. 

عینی دمده اسرائیل, حماس نینگ قولیده گی اسیر لر سانی نینگ 239 نفر ایکن لیگینی بیلدیردی.