Franśiyädä mêrlar bayraqlarnı töşerüdän baş tarttı

Franśiyädäge qayber mêrlar, monarxiyä töşençäseneñ ildäge cömhüriyätçe sistemağa qarşı kilüen belderep, patşabikä Êlizabet İkençeneñ cenaza cıyını öçen bayraqlarnı yartılaş töşermäyäçäklären citkerde.

8nçe sentyabr’ pänceşämbe könne patşabikäneñ ülem xäbärennän soñ Franśiyä ilbaşı Êmmanuêl’ Makron Angliyäneñ iñ ozaq waqıt täxettä qalğan xökemdarına xörmäten beldergän berençe däwlät başlıqlarınnan berse ide. İkençe könne ilbaşı rezidenśiyäse Yelisey Sarayında bayraqlar yartılaş töşerelde. Xökümät räise Êlizabet Born mêriya häm başqa däwlät binalarına patşabikäneñ 19nçı sentyabr’dä uzaçaq cenaza cıyını çaraların ütäw kürsätmäse birde. İlneñ qayber cirle xakimiyät başlıqları bu ämerne ütärgä telämi.

Burj şähäreneñ sośialist mêrı Yan Galut Franśiyäneñ cömhüriyätçe däwlät buluın assızıqlap bolay dide: “İngliz dıslarıbıznıñ xäsrätenä xörmät belän qarıym, tik şähärneñ xakimiyät binaları östendä Franśiyä bayrağın yartılaş töşermäyäçäkmen”.

Sul qanattan La France Insoumise partiyäse äğ’zası bulğan Faş-Tyumenil’ mêrı Patrik Proyzi da kürsätmäne ütämäyäçägen äytte. “Başqa bernindi töşençä tigezlek häm monarxiyä şikelle ber-berennän yıraq tügel,”-dide ul.

Başqala Parijnıñ Jenvil’ye bistäse mêrı, kommunist Patris Leklerk ta kürsätmäne kürmämeşkä salışaçağın belderde.