Gebreyesus Kovid-19 turındağı sannar belän urtaqlaşırğa çaqırdı

Bötendön’ya sälamätlek saqlaw oyışması ğomum mödire Tedros Adxanom Gebreyesus 194 ildän barı 53eneñ yäş’ häm ceneskä qarap ülemnär turında mäğ’lümat citkerüen iskärtep, barlıq däwlätlärne Kovid-19 kizüe belän bäyle qullarında bulğan kürsätkeçlär belän urtaqlaşırğa çaqırdı. Ul Şveyśariyäneñ Jeneva şähärendä uzğan matbuğat cıyılışında täwge koronavirus oçrağı terkälgännän soñ 3 yıl uzuın, bu waqıt êçendä testlar häm vakśinalar uylap tabıluın söyläde.

Gebreyesus Omikron variantınıñ iñ yuğarı däräcägä citüennän soñ urtaqlaşılğan yoqtıru oçraqları sanında 90%lıq kimü küzätelüen belderde. Ul kürsätkeçlär belän urtaqlaşuçı illär sanınıñ da öçtän bergä azayuın äytä.

Gebreyesus illärneñ Omikron variantı çorında yasağan test häm oçraq urtaqlaşı däräcäsen saqlıy almawların añlawın, tik bernärsä dä êşlämiçä virusnıñ betüen kötüneñ dä mäğ’näse bulmawın söyläde. Ul kürsätkeçlärneñ Omikronnıñ subvariantı XBB.1.5 şikelle yaña variantlarnıñ kilep çığuın häm taraluın küzätep baru öçen ähämiyätle buluın iskärtä.

Gebreyesus dön’yanıñ kizü mäs’äläsendä ber yıl êlekkegedän tağın da yaxşıraq xäldä buluın äytä. “Uzğan yılnıñ fevralennän birle Bötendön’ya sälamätlek saqlaw oyışmasınıñ atnalıq bularaq beldergän ülem sanında 90% kimü bar. Tik sentyabr’ urtasınnan başlap atnalıq bularaq belderelüçe ülem sanı 10 belän 14 arasında qısılıp qaldı. Qulıbızda bolarğa çik quyu öçen çaralar bulğan waqıtta dön’ya bu ülemnärne qabul itä almas,”-dide ul. Virus arqasında uzğan atnada 11 meñ 500 ülem turında xisap birelgän, bolarnın 40%ınıñ Amerikada, 30%ınıñ isä Awrupa häm Könbatış Tın okean regionında buluı belderelä.

Qıtaydağı Kovid-19 belän bäyle ülemnärneñ kimetep citkerelüen küz uñında totqanda, bu sannıñ tulı bulmawı açıq. Gebreyesus ğomere özelüçelärneñ kübeseneñ risk törkemendägelär häm qartlar ikänen iskärtä.

"194 ildän barı 53e yäş’ häm ceneskä qarap ayırılğan ülemnär turında kürsätkeçlär cibärä. Dürtençe yılına kergän kizü prośessında barlıq däwlätlärne mäğ’lümat belän urtaqlaşırğa çaqırabız. Niqadär kübräk sannarğa iyä bulsaq, kizü turında şulqadär tulı küreneşkä iyä bulırbız,”-di Gebreyesus.  Ul illärne qartlar häm risk altındağı törkemnärne vakśinalaştırırğa, keşelärne saqlaw öçen barlıq çaralarnı kürergä çaqıra.