"Ber genä däwlät tä monnan soñğı pandemiyägä äzer tügel"

Bötendön’ya sälamätlek saqlaw oyışması koronavirus kizüeneñ äle haman xalıqara aşığıç xäl täşkil itüen, virusnıñ isä bügen dä xätär yoğışlı awıru buluın citkerde. Bu xaqta oyışmanıñ axırğı cıyılışınnan soñ yazmaça belderü yasaldı. Anda kizüneñ küçü noqtasında buluı farazlana häm çirneñ keşe sälamätlegenä global’ räweştä yanawdan tuqtamawı assızıqlana.  

Belderüdä monduy yullar bar: “Komitet, xäzerge waqıtta dön’yada äyläneştä yörüçe Omikron subvariantları yuğarı däräcädä yoğışlı buluına qaramastan, monnan aldağı variantlar belän çağıştırğanda, infekśiyä häm citdi xastalıq arasında ayırma barlığın qabul itte. Tik virus aldan kürelmägän üzençäleklärgä iyä yaña variantlarğa äwerelü säläten saqlıy”.

Belderüdä virusnıñ global’ täêsiren çikläw öçen qayber kiñäşlärgä urın birelä.

Bötendön’ya sälamätlek saqlaw oyışması ğomum särqatibe Tedros Adxanom Gebreyesus 25nçe ğıynvarda yasağan belderüendä soñğı 8 atnada Kovid-19 säbäple 170 meñnän artıq keşeneñ ğomere özelüen äytte.  

Şul uq waqıtta Xalıqara Qızıl Xac häm Qızılay cämğıyät’läre federaśiyäsennän citkerülärençä, terkälgän tarixta ber genä cir teträw, qorılıq yäisä dawıl da Kovid-19 kizüennän tağın da kübräk can almadı.

Ülüçe sanınıñ 6 million yarımnan artığraq buluı farazlanğan belderüdä ber genä däwlätneñ dä monnan soñğı pandemiyägä äzer tügellege, illärneñ berdän kübräk yanawğa äzer buluı kiräklege assızıqlana.