"Pandemiyä bette"

Amerika Quşma Ştatlarınıñ Wäkillär palatasında koronavirus kizüe nisbätennän iğ’lan itelgän “milli ğadättän tış xäl”neñ kiçekmästän tögällänüen küzallawçı “Pandemiyä bette” başçalı qanun proyektı qaraldı. “Xalıq sälamätlege aşığıç xäle” Kovid-19 kizüe säbäple Donal’d Tramp ilbaşı bulğan 2020nçe yılda iğ’lan itelgän ide. Cömhüriyätçelär küpçelektä bulğan Wäkillär palatasında xalıq ışanıçlıları anıñ beterelüe öçen tawış birde.

“Pandemiyä bette” başçasın yörtüçe qanun proyektına 210 ışanıçlı qarşı çıqtı, 220se xupladı. Şulay itep dokument qabul itelde.

Cömhüriyätçelär kizü belän bergä kilgän vakśina häm bitlek mäcbüriyäte şikelle xalıq sälamätlege belän bäyle tärtiplärgä qarşı çıqqan ide. Alar, AQŞ ilbaşı Djo Baydennıñ uzğan yıl “Kovid-19 kizüe bette” belderüen xäterlätep, älege qanun proyektın kön tärtibenä çığardı.  

Aq Yort idaräse häm byudjet dairäse kiçä yasağan belderüendä Kovid-19 säbäple kertelgän “milli ğadättän tış xäl” häm “xalıq sälamätlege aşığıç xäle”neñ sälamätlek saqlaw sistemasında butalçıq häm bilgesezleklär kiterep çığaruın häm monı çikläw öçen 11nçe mayda betereläçägen citkergän ide.

Dokumentnıñ demokratlar küpçelektä bulğan Senattan da uzuı kiräk. Tik Senattan uzsa da, Bayden qanun proyektına veto quyaçağın belderde.