Nigerdağı xunta yaña belderü yasadı

Nigerda 26nçı iyül’dä idaräne basıp alğan xärbi xunta saylap quyılğan ilbaşı Möxämmät Bazumnı “watanğa xıyanät” öçen xökem itärgä teläwen (тeләвeн) citkerde.

Watannı saqlaw milli şurası süzçese Amadu Abdurraxman uqığan belderüdä: “Niger xökümäte tüntärelgän ilbaşı häm anıñ cirle, çit il äşnäläreneñ “watanğa xıyanät” häm “êçke-tışqı iminlekne qurqınıç astına quyu” ğayıpläwläre belän milli häm xalıqara organnar qarşında xökem itelüe öçen kiräkle dälillär cıydı”, - diyılä.

Belderüdä qayber könbatış Afrika säyäsätçeläre belän bäyle lobbilarnıñ “küçeş xökümäte” turında yalğan xäbärlär taratuına iğ’tibar cälep itelä. Bu xälne alar kisken ğayıpli.

İsegezgä töşeräbez, Nigerda ilbaşı Möxämmät Bazum 26nçı iyül’dä däwlät başlığı gvardiyäse äğ’zaları tarafınnan totıqlandı häm şul uq könne kiçen xärbilär idaräne üz qullarına aluın xäbär itte.

Däwlät başlığı gvardiyäse komandirı, general Abdurraxman Çiani 28nçe iyül’dä Watannı saqlaw milli şurası dip ataluçı xuntanıñ liderı buldı häm küçeş xökümäten citäkläde. 9nçı avgustta Lamine Zeyne xökümät räise bularaq bilgelände, ber könnän soñ 21 äğ’zadan toruçı kabinet iğ’lan itelde.