Awrupağa sıyınğan balalar yuqqa çıqtı
Yuğalğan möhacir balalarnıñ kübeseneñ oyışqan cinayät’çel törkemnär qulına töşüe uylanıla
Awrupağa axırğı 3 yılda barıp ireşkän qarawçısız 50 meñnän artıq balanıñ yuqqa çığuı belderelä. Kübeseneñ oyışqan cinayät’çel törkemnär qulına töşüe uylanıla.
Bel’giyäneñ “De Standaard”, “VRT” häm “Knack” media oyışmalarınıñ “Awrupada yuğalğannar” dip ataluçı jurnalist tikşerenüendä 2021nçe yıldan 2023kä qadär yannarında yaqınnarı bulmağan 51 meñ 433 möhacir baladan xäbär-xäter bulmawı açıqlana. İñ küp yuğalğan bala İtaliyägä turı kilä - 22 meñ 899. Avstriyädä 20 meñ 77 bala xäbär-xätersez yuqqa çığa, Bel’giyädä - 2 meñ 241, Germaniyädä - 2 meñ 5 häm Şveyśariyädä - 1226. Greśiyä häm Pol’şa şikelle möhacirlär küp bulğan illärdän mäğ’lümat alınmağan. Şuña kürä çınlıqta sannarnıñ tağın da zurraq buluı farazlana. Alarnıñ şaqtıy öleşeneñ cinayät’çel oyışmalarğa êlägüe yäisä mäcbüri êşlätelüe uylanıla.
Awrupa Berlege komissiyäseneñ êçke êşlär öçen cawaplı äğ’zası İl’va Yoxansson jurnalist tikşerenüenä interv’yusında bolay di: “Sıyınuçılar Awrupa Berlege äğ’zası ber däwlättä terkälä, annan soñ qaça yäisä başqa ilgä kitä. Migraśiyä sisteması cimerek xäldä”.
Yoxansson uzğan yıl qarawçısız 40 meñ balanıñ Awrupağa kerüen belderde. Ul yaña migraśiya kileşüe belän sistemanıñ tözäteläçägen häm, anıñ ber öleşe bularaq, qarawçısız balalarnıñ avtomat räweştä sıyınu prośedurasına kerteläçägen söyläde.
Bel’giyä sıyınuçılarnı qabul itü oyışması cirle mediağa beldergänçä, 2021nçe yılda - 831, 2022dä - 578 häm 2023tä 832 oçraq terkälä, alarnıñ kübesendä balalar urnaştırılğan üzäklärdä yuqqa çığa.
Şundıy uq êşçänlekneñ 2018nçe-2020nçe yıllarnı üz êçenä alğanında Awrupadağı yuqqa çıqqan bala sanı 18 meñ 292 dip açıqlana.
