Su basu qorbannarınıñ sanı artqan

 Braziliyäneñ kön’yağındağı Riu - Grandi- du - Sul ştatında köçle yawım-töşemnär kiterep çığarğan su basudan ğomerlären yuğaltqan keşelär sanı 29ğa, yuğalğannar sanı 60qa citkän.

Bu xaqta ştatqa bäyle Grajdannar saqlanu bülekçäse xäbär itä.

Oyışma belderüendä äytelgänçä, yañğırlar 154 qasabada zur zıyan kitergän, su basu 71 meñ 300 keşegä tiskäre yoğıntı yasağan.

Riu- Grandi- du - Sul  ştatı gubernatorı Êduardo Leyt “Bez ğadättän tış xäl kiçeräbez, bu däwlät tarixında iñ ayanıçlı waqıyğa” dip beldergän.

Ul êzläw häm qotqaru êşläreneñ däwam itüen äytkän.

Leyt faciğanıñ zurlığı arqasında 180 könlek afät torışı iğ’lan itülären, xalıqnı êvakuaśiyäläw öçen zur köç quyuların citkergän.

Köçle yawım-töşemnär häm su basu küzätelgän ştatqa Braziliya däwlät başlığı da kilgän. Ul xökümät bularaq ştatqa tulı yärdäm kürsätülären beldergän.

İlbaşınıñ säfärennän soñ su basqan töbäklärgä Hawa köçläreneñ 8 oçqıçı häm 600 xärbi xezmätkär cibärelgän.