Bayden İzrailgä qoral cibärmäyäçäklären belderde

AQŞ ilbaşı Djo Bayden, İzrail Räfaxqa kiñ külämle höcüm başlasa, aña qoral cibärüne tuqtaçaqların äytte. Ul CNN kanalına interv’yusında Ğazzä mäs’äläsenä tuqtaldı.

Bayden idaräseneñ uzğan atnada yaqınça 900 kilolı bombalarnıñ İzrailgä täêminatın tuqtatuına qarata bolay di: “Ğazzädäge tınıç xalıq bu bombalar näticäsendä häm İzrailneñ toraq punktlarğa kerüe arqasında üterelde”. Şulay itep, ul Amerikada çığarılğan bombalarnıñ Ğazzädä fälästinlelärne üterüdä qullanıluın qabul itte.   

Bayden monnan alda da berniçä tapqır İzrailne Räfaxqa qarata cirdän külämle höcümgä kereşmäw mäs’äläsendä kisätülären xäterlätte. Ul xökümät räise Bin’yamin Netan’yaxu belän oçraşu waqıtında da monı açıq räweştä citkerüen äytte.  “Älegä külämle höcüm belän kermädelär, ägär kersälär, ul çaqta Räfax häm başqa şähärlärdä qullanılğan qorallarnı cibärmäyäçägebezne açıq räweştä belderdem”,-dide AQŞ ilbaşı Bayden. Ul İzrailneñ iminlegen saqlaw burıçların äle haman ütäwlären dä iskärtte.