Ğazzädäge wäzğıyät'

İzrail häm "Xamas" arasındağı dähşät özleksez räweştä däwam itä. Ğazzädä yäşäwçelär öçen bu - bolay da köçle kontrol' astındağı tormışlarınıñ qabat yanaw astında buluın añlata.

Maxär Kallab - Ğazzä watandaşı:

- Bügen min öydän çıqqaç berniçä minut uzuğa yortıbızğa hawa höcüme yasaldı. Bu höcüm min moñarçı hiç kürmägän qadär zur şartlaw kiterep çığardı. İzrail bu höcümnärne barı binalarnı cimerü öçen tügel, ber ük waqıtta, keşelärne üterü öçen yasıy. Cimerelülärneñ küläme bik zur häm höcümnärneñ qorbanı härwaqıt tınıç xalıq bula. İzrail bügen hawa höcümnäreneñ kübesendä monda yäşäwçelärgä cirlektän kitärgä çaqırıp kisätü yasamadı.

Fälästin sälamätlek saqlaw ministrlığı töbäktä mediśina kiräk-yaraqları häm cihazları mäs'äläsendä citdi problema buluın häm yaralanğan bik küp fälästinlene däwalaw mömkin tügellegen belderä. İzrail höcümnär waqıtında aşığıç yärdäm törkemnären küp tapqırlar nişanğa aldı häm Ğazzäneñ tön'yağındağı "Beit Xanoun" xastaxanäse dä yaraqsız xälgä kilde.

Xazäm Qassäm - "Xamas" süzçese:

- İzrailneñ basıp aluçı köçläre ber yaqtan üzlären yaqlaw häm cirlären kire tartıp alu xoquqın qullansa, ikençe yaqtan isä tınıç xalıqnı cäzalaw şikelle äşäke niyät belän xäräkät itä. İzrail axır çiktä cawapqa tartılırğa tiyeş suğış cinayät'läre êşläde. Xalqıbızğa qarata höcümnär däwam itkändä utnu tuqtatu turında söyläşmäyäçäkbez. Xäzerge waqıtta böten iğ'tibarıbız - suğışta.

İzrail Ğazzä töbägen êlektr, êlemtä häm çista sudan mäxrüm itte. Çiklärneñ yabıluı cirlektäge gumanitar krizisnı tağın da awırlaştırdı, çönki xäzergä qadär Ğazzägä mediśina, azıq-tölek häm yağulıq yärdäme kilmäde. Berdänber ğamäldäge çığu noqtası bulğan Misır häm Ğazzä arasındağı Refax çik qapqası da İzrailneñ hawa höcümnärendä qayber bülemnäre zarar kürgännän soñ tulısınça yabıldı. "Xamas" bäreleşlär başlanğannan birle taläplären qabul itterü öçen totıq itep alğan İzrail watandaşların qullanırğa uylıy ide. "Xamas", ägär İzrail  kisätü yasamıyça Ğazzädäge sivillärneñ öylärenä höcümnären däwam itsä, izraille mäxkümnärne ülemgä duçar itäçägen belderde. İzrail höcümnären şul uq köç belän däwam itte, xätta, Ğazzä şähäreneñ näq' üzägendä urnaşqan häm keşe küp yäşi torğan strategik ähämiyätkä iyä Al-Rimal mäxälläsendä höcümnären tağın da arttırdı.

Maxär Mäzxär - Fälästin xalıq frontı wäqalätlese:

- Netan'yaxu üzeneñ ottıruın, küpläp ütereşlär başqarıp, balalarnıñ ğomeren özep häm öylärne cimerep, küreneştä ciñügä äwerelderergä mataşa. Bez härwaqıt qararlı torışıbıznı däwam itäçäkbez. İzrailneñ mondıy säyäsätläre xalqıbıznı zäğıyf'ländermäyäçäk, çönki bezneñ êşebez - xaqlı êş.

Töbäktäge grajdanlılar däwam itüçe dähşät spirale häm İzrailneñ cirdän operaśiyä oyıştıru ixtimalı säbäple citdi yanaw qarşında tora. Mediśina kiräk-yaraqlarınıñ azlığı citdi problema kiterep çığara, töp xezmätlär isä kürsätelmi. Problemalarnı tağın da tiränäytüçe isä - İzrail belän "Xamas" arasında utnı tuqtatu kileşüenä barunıñ mömkin şikelle kürenmäwe.