"Qırımnıñ Rusiyägä quşıluı qanunsız"
Törkiyä Qalqınu ministrı Cäwdät Yılmaz qırım tatarları mäs’äläsendä ileneñ sizgerlegen belderde.
Yalta Awrupa strategiyäse 11nçe yıllıq konferentsiyäse Rusiyäneñ Qırımnı basıp aluı arqasında bıyıl berençe märtäbä Ukraina başqalası Kievta ütkärelde.
Konferentsiyädä Törkiyäne wäkillek itüçe Qalqınu (üseş) ministrı Cäwdät Yılmaz qırım tatarları mäs’äläsendä Törkiyäneñ sizgerlegen citkerde.
Ministr Yılmaz, Törkiyäneñ häm Awrupa Berlege belän tulı äğzalek söyläşülären alıp baruın, häm Ukraina belän strategik urtaq (partnyor) buluın häm dä Rusiyä Federatsiyäse belän bik yaxşı mönäsäbätlärdä buluın iskä töşerep, bu wazğiyätneñ model täşkil itüen añlattı.
Yalta Awrupa strategiyäse 11nçe forumında çığış yasawçı Qalqınu ministrı Cäwdät Yılmaz Törkiyä belän Ukrainanıñ geopolitik bularaq kritik ähämiyätkä iyä, Awraziyanıñ üzäk nığıtması bularaq tanıtıla alınaçaq töbäktä urnaşuına işarä itte.
Yılmaz bu wazğiyätneñ qayçağında niğmät, qayçağında da borçılırlıq näticälärgä säbäp bulğan awırlıq täşkil itüen assızıqladı.
Törkiyäneñ häm Rusiyä häm dä Awrupa Berlege belän xezmättäşlek urnaştıruına iğtibarnı yünältüçe Yılmaz: "Ukrainanıñ da Rusiyä belän iqtisadi elemtälären üsterüe häm ike il öçen, häm dä Awrupa öçen faydalı”, - dip uylawların belderde.
Ministr Yılmaz Törkiyäneñ kürşeläre belän urtaq mänfäğät häm qimmätlär nigezendä regional urtaqlıqlar tözüen, bu säyäsätneñ totrıqlılıq häm baylıq tudıruın äytte.
Yılmaz Rusiyäneñ Qırımnı qanunsız räweştä üz cirlärenä quşuın belderde.
Cıyılıştan soñ Törkiyäneñ Kiev ilçelegenä baruçı ministr Yılmaz qırım tatarları liderlarınnan häm Ukraina xalıq ışanıçlısı Mostafa Cämil Qırımoğlı belän küreşep söyläşte.
Oçraşunıñ näticäle uzuın assızıqlawçı Yılmaz Törkiyäneñ Ukrainanıñ berlegen häm cir bötenlegen yaqlawına tağın ber qat basım yasadı.
