"Litva tatarları tarixı häm mädäniyäte yılı" çaraları Änkarada da uzdı

Litva 2021nçe yılnı Litva tatarları tarixı häm mädäniyäte yılı dip iğ’lan itkän ide. Şul uñaydan Änkarada da çara oyıştırıldı.

Çit ildä yäşäwçe töreklär häm tuğandaş cämğıyät’lär oyışması YTB, Litva häm Ukrainanıñ Änkaradağı ilçelekläre, Qırım tatarları mädäniyät häm yärdäm cämğıyäte qatnaşında äzerlängän tantana başqalanıñ Räsem häm häykäl muzeyında uzdı. Ul Litva tatarlarınıñ tarixı häm mädäniyätenä bağışlanğan fotokürgäzmä belän başlandı. Şunnan soñ Litvadağı tatarlar turında çığış buldı.

Litvanıñ Änkaradağı ilçese Rikardas Degutis tatarlarnıñ niçek itep Baltıyq buyına kilüe turında mäğ’lümat birde.

Çit ildä yäşäwçe töreklär häm tuğandaş cämğıyät’lär oyışması YTB räise urınbasarı Abdulxadi Turus Ukrainanıñ cir bötenlege häm suverenlığı tışında Qırım tatarlarınıñ mädäni mirasın saqlaw mäs’äläsendäge cawaplılıqların belülären assızıqladı. Ul YTBneñ Qırım häm qırım tatarları belän bäyle bik küp proyekt tormışqa aşıruın da äytep uzdı.  

Tantana Qırım ğailäse mäktäbe uquçıları äzerlägän konśert häm milli biyülär belän däwam itte.