Qırğızstan belän Tacikstan çigendäge qorallı bäreleştän soñ ike il arasında protokolğa qul quyıldı

Qırğızstan belän Tacikstan çigendäge qorallı bäreleştän soñ ike il küzläw oyışmaları citäkçeläre arasında tınıçlıq urnaştıruğa yünältelgän protokolğa qul quyıldı.

Qırğızstan milli qurqınıçsızlıq däwlät komitetı räise Kamçıbäk Taşiyev belän Tacikstan milli qurqınıçsızlıq däwlät komitetı başlığı Saymumin Yatimov Tacikstanda oçraştılar.

Oçraşuda 16 nçı sentyabr’dä cirle waqıt belän 16 säğät’tä utnı tuqtatu iğ’lan itelgännän soñ xärbi köçlärneñ çigenüe häm wäzğıyät’ne totrıqlılandıru turında protokol imzalanuı belderelä.

Oçraşu barışında Taşiyevneñ Tacikstan tarafınnan totqarlanğan 4 Qırğızstan ğäskäriyen irekkä cibärüne täêmin itüe äytelä.

İsegezgä töşeräbez: ike il çik ğaskärläre comğa könne irtänge säğät’lärdä bäreleştelär. Anda ike yaqtan da qorbannar buldı.