Xaqan Fidan Mavritaniya tışqı êşlär ministrı belän oçraştı

Törkiyä tışqı êşlär ministrı Xaqan Fidan İstanbulda Mavritaniya tışqı êşlär ministrı Möxämmäd Sälim Merzuk belän küreşep söyläşkännän soñ ütkärelgän urtaq matbuğat oçraşuında çığış yasadı.  

Ministr Törkiyä ilbaşı Räcäp Tayyip Ärdoğannıñ irtägä Ğıyraqqa säfär yasayaçağın belderep, vizit waqıtında 20 dän artıq kileşügä qul quyu öçen al êşçänleklärneñ tämamlanuın citkerde.

”Bezneñ maqsatıbız - regional’ totrıqlılıq häm üseştä qatnaşu, töbäktä tärtip häm tınıçlıq urnaştıru öçen köçebezdän kilgänne êşläw”,- dide Xaqan Fidan.

Tışqı êşlär ministrı Ärdoğannıñ Bagdat häm Ärbildä bulaçağın, Bagdatta Ğıyraq prem’yer-ministrı belän oçraşıp kileşülärgä qul quyılaçağın äytte.

Fidan beldergänçä, Törkiyä ilbaşı Ğıyraq ilbaşı Abdullatif Räşid belän dä oçraşaçaq.

Xaqan Fidan Törkiyäneñ Mavritaniya belän tarixi bäyläneşlärenä basım yasadı.

 Ul Säxil töbägendäge kiyerenkelekkä basım yasap:”Bez töbäktä tınıçlıq, qurqınıçsızlıq, daimi totrıqlılıq urnaştıruğa zur ähämiyät biräbez. Citdi qurqınıçsızlıq problemalarına duçar bulğan Säxil zur üzgäreşlär kiçerä. Bu töbäkneñ iminlege böten Afrika öçen strategik ähämiyätkä iyä. Bez Törkiyä bularaq töbäk iminlege häm totrıqlılığı öçen xezmättäşlekne häm mönäsäbätlärne yaxşırtu öçen zur tırışlıq quyunı däwam itäçäkbez”,- dide.

Törkiyä ministrı bügenge oçraşuda ike yaqlı mönäsäbätlärne bäyäläwlären citkerde.

Fidan bilgeläp uzğança, oçraşuda Ğazzädäge waqıyğalar da çittä qalmadı.

Mavritaniya tışqı êşlär ministrı Merzuk üz çığışında Törkiyädäge tabiği çığanaqlar, tabiği gaz, yañartıla torğan ênergiya häm yäşel vodorodnıñ ile öçen bik möhim buluın belderde.

Merzuk ike il arasında Urtaq iq’tisadi komitet cıyu turında kileşü täêmin itelüen äytep uzdı.

Ul Fidan belän Säxil töbäge xaqında söyläşülären dä citkerde.

Mavritaniya tışqı êşlär ministrı Säxil töbägendä törle krizislar küzätelüen, mondağı xälneñ qatlawlanuın, biredäge qurqınıç häm problemalarnı cirle tırışlıqlar häm Törkiyä kebek qardäş illär yärdäme belän ciñep bulaçağın assızıqladı.