Ärdoğan: Törkiyä Ğazzä sınawın iñ uñışlı uzuçı illärdän berse

Törkiyä ilbaşı Räcäp Tayyip Ärdoğan Waqıf atnası açılışı häm Waqıf büläklären tapşıru tantanasında çığış yasadı. Anda ul Ğazzädäge waqıyğalarğa tuqtaldı. “Fälästin xalqınıñ iñ awır könnärendä yärdäm çaqıruına aşıqqan ğaziz millätebez qardäşlek wazıyfasın başqardı häm keşelekneñ vöcdanı buldı. Törkiyä Ğazzä sınawın iñ uñışlı uzuçı illärdän berse”,-dide Ärdoğan. Ul bügengä qadär yaqınça 50 meñ tonna gumanitar yärdäm cibärelüen xäterlätte. Törkiyä Ğazzägä iñ küp yärdäm iltüçe däwlät.  

Ärdoğan Törkiyäneñ İzrailgä qarşı Xalıqara mäxkämädä açılğan genośid däğ’wasına quşılırğa qarar qıluın da äytte. “15 meñe bala 35 meñ qardäşebezneñ tormışın özüçelärneñ xoquq qarşında cawap birüe öçen barlıq mömkinleklärne qullanaçaqbız,”-dide Törkiyä ilbaşı.