Kön’yaq Qavqaz cömhüriyätläreneñ könüzägendäge waqıyğalar

“Awraziya qaytawazı” programmasında bu yulı Kön’yaq Qavqaz cömhüriyätläreneñ könüzägendäge waqıyğalar xaqında süz baraçaq. Uzğan atnada regionda ähämiyätle säfärlär häm täräqqıyät’lär buldı. Xäzer alarğa çirattan küz salıyq.  

10nçı aprel’dä Azärbaycan ilbaşı İlham Äliyıv Qazaqstanğa räsmi säfär yasadı. Astana şähärendä anı däwlät başlığı Qasıym-Cumart Toqayev tantana belän qarşı aldı. İke ilneñ liderı delegaśiyälär belän bergä külämle söyläşü uzdırdı. Anıñ näticäsendä Azärbaycan – Qazaqstan yuğarı däräcäle xezmättäşlek şurası tözelde.  İlbaşları Toqayıv häm Äliyıv bergä Astana xalıqara finans üzägenä bardı. Alar, şulay uq, qalada Xäydar Äliyıv uramı açılışında qatnaştı.

13nçe aprel’dä Azärbaycan ilbaşı İlham Äliyıv Bosniya-Gerśegovinağa da räsmi säfär yasadı. Ul biredä ilbaşı şurası räise Jel’ka Śviyanoviç belän oçraştı. Söyläşüdän soñ ike däwlät mönäsäbätlären strategik däräcägä citkerüçe kileşü imzalandı. Bosniya-Gerśegovina Baqıda ilçelek açu qararı çığardı.

11nçe aprel’dä İlham Äliyev (Äliyıv) Bosniya-Gerśegovinanıñ iminlek ministrı Nenad Nesiçnı qabul itkän ide. İlbaşı şurası räise Jel’ka Śviyanoviç isä 1 ay êlek Azärbaycanğa säfär yasadı.

İlham Äliyıvnıñ könçığış häm könbatışqa säfärläre Azärbaycannıñ xalıqara säwdä häm ênergetika mäydannarında ähämiyäten kürsätä.

Azärbaycan parlamentı räise Säxibä Gafarova 13nçe-14nçe aprel’dä Sankt-Peterburgta uzğan Bäysez däwlätlär berdämlegeneñ 55nçe parlamentlarara assambleyası cıyılışında qatnaştı. Ul säfäre qısalarında ikeyaqlı oçraşular da ütkärde.  

11nçe aprel’dä Ärmänstannıñ saqlanu ministrı Suren Papikyan Brüssel’gä säfäre qısalarında NATO Awrupa berlektäş köçläre yuğarı komandalığına bardı. Kollektiv iminlek kileşüe oyışmasınıñ xärbi öyränülären üz cirlärendä uzdırunı kire qaqqan Ärmänstan 22nçe aprel’dä NATO belän bergä öyränülär uzdıraçağın belderde. Bu anıñ belän Rusiyä arasında kiyerenkelek kilep çığuına säbäpçe buldı. Rusiyä tışqı êşlär ministrlığı Ärmänstannan bu mäs’älä belän bäyle añlatma taläp itte. Süz uñayınnan, NATOnıñ älege öyränülärendä Gruziyä belän Moldova da qatnaşa.  

Şul uq könne Azärbaycan belän Ärmänstan çigendä qorallı bäreleş buldı. Azärbaycannan – 3, Ärmänstannan 4 ğaskäri ülde. Ärmänstan xökümäte räise Nikol’ Paşin’yan 2 könnän soñ belderü yasap 1991nçe yılğı çiklärgä kire qaytırğa äzer buluların citkerde.

Şul uq waqıtta 14nçe aprel’dän 23enä qadär Yerivanda uzuçı Awrupa awır atletika çempionatı açılışında ärmännär Azärbaycan bayrağın yandırıp provokaśiyä oyıştırdı. Yarışlarğa kilgän 12 keşelek Azärbaycan komandası şunnan soñ çempionatnı qaldırıp illärenä qaytıp kitte.

Gruziyädä isä ilbaşı idaräse belän xökümät arasındağı kiyerenkelek däwam itä. İlbaşı Saloma Zurabişvili xökümätne üzeneñ 18nçe aprel’gä planlaştırılğan Awrupa Parlamentına säfären kiçekterüdä ğayepläde. Xökümät monıñ yalğan buluın alğa sörde.

Küñelle xäbärlärgä kilgändä, Türkiyä törki däwlätlärneñ liderlarına “TOGG” avtomobilen büläk itte.  Azärbaycan ilbaşı İlham Äliyıv häm Üzbäkstan däwlät başlığı Şäwkät Mirziyayıv üzläreneñ bülaklaren qabul itep aldı. Qırğızstan monnan alda üzendä TOGG êşxanäse açarğa täq’dim itte.