زلنسکی خالقا سسلندی
"روسیا اوردوسو اوکرایناداکی ساواش سیراسیندا تقریباً ۴۰ مین عسگر ایتیردی
اوکراینا دؤولت یاشقانی ولودیمیر زلنسکی، روسیا اوردوسونون اوکرایناداکی ساواشی سیراسیندا تقریباً ۴۰ مین عسگر ایتیردیگینی سؤیله‌دی.
خالقا سسلنن اوکراینا پرزیدنتی، روسیا ایله اوکراینا آراسین‌داکی ساواشی دگرلندیردی. اونون سؤزلرینه گؤره، ۲۴ فوریه‌دن بو گونه قدر اون مینلرجه روسیالی عسگر ایسه یارالاندی.
اوکراینانین اود‌سا شهرینین یئنی‌دن روسیا طرفیندن وورولدوغونو خاطیرلادان زلنسکی:
"روسیا ساوونما باخانلیغی بو جور سالدیریلارلا باغلی نه یالان دئسه ده، بیز موطلق بونا جاواب وئره‌جییک. ایشغالچیلار جزاسیز قالمایاجاق" دئدی.
روسیانین اؤز خالقینا ساواش ایله باغلی بیلگی وئرمه‌دیگینی ادعا ائد‌ن زلنسکی،
"روسیا اوردوسو اوکرایناداکی ساواش سیراسیندا تقریباً ۴۰ مین عسگر ایتیردی. بو روسیا اوردوسونون ۲۴ فوریه‌دن بری ایتیردیگی عسگرلرین ساییسیدیر. داها اون مینلرجه یارالی وار" دئیه دانیشدی.
ولودیمیر زلنسکی اینگیلتره‌نین روسیایا قارشی تحریملر لیستینی گئنیشله‌ندیرمک قرارینی آلقیشلایدیغینی سؤیله‌یرک:
"اونلارجا اینسان و قورولوش داها لیسته علاوه ائدیلدی. بو، دوزگون توتومدور و من اینگیلتره‌‌یه بو قونوداکی عزمینه گؤره مینتدارام" ایفاده‌لرینی ایشلتدی.
طبیعی گاز بحرانینی دا دگرلندیرن اوکراینا لیدئری: "اؤزللیکله ده آوروپا بازاریندا گازین قیمتینین مین مکعب متر اوچون ۲ مین دلاردان چوخ آرتماسی ایله باغلی خبرلر آرتیق روسیایا قارشی تحریملرین گئنیشلندیریلمه‌سی اوچون کیفایتدیر'' دئدی.
