ایسرائیل گوجلری شفا خسته‌خانا‌سینی تامامیله داغیدیب گئری چکیلیب
ایسرائیل گوجلری‌نین شفا خسته‌خاناسی‌نین بوتون بینالارینی یاندیردیغینی، بوتون طبی لوازیماتلاری محو ائتدیی‌ینی و خسته‌خانانی احاطه ائدن کوچه‌لرده اون‌لارلا اؤلو اولدوغو قید ائدیلیب
ایسرائیل گوجلری غزه زولاغینین ان بؤیوک ساغلیق کومپلکسی اولان شفا خسته‌خانا‌سینی اشغال ائتدیکدن 14 گون سونرا خسته‌خانانی تامامیله داغیدیب و گئریده اون‌لارلا اؤلو قو‌یوب گئری چکیلیب.
شاهیدلرین بیلدیردیگینه گؤره، ایسرائیل اوردوسونون گوجلری شفا خسته‌خاناسی و اطراف یاشاییش منطقه‌‌لریندن تامامیله گئری چکیله‌رک غزه شهری‌نین گونئی باتیسینداکی تل الهوا بؤلگه‌سینین گونئیینه دوغرو ایرلیله‌ییب.
ایسرائیل گوجلری‌نین شفا خسته‌خاناسی‌نین بوتون بینالارینی یاندیردیغینی، بوتون طبی لوازیماتلاری محو ائتدیی‌ینی و خسته‌خانانی گئری چکیلمزدن اول تامامیله استفاده‌دن چیخاردیغینی بیلدیرن شاهد‌لر شفا خسته‌خانا‌سیندا و خسته‌خانانی احاطه ائدن کوچه‌لرده اون‌لارلا اؤلو اولدوغونو قید ائدیب‌لر.
حادثه شاهد‌لری بیلدیریب‌لر کی، اوردو فیلیسطینلیلرین شفا خسته‌خانا‌سیندا قوردوقلاری مووقتی قبیریستانلیغی داغیدیب، جسد‌لری چیخاراراق خسته‌خانا‌نین موختلیف یئرلرینه آتیب.
فیلیسطین ساغلیق رسمیلری ده خسته‌خانا‌نین تامامیله خیدمتدن چیخدیغینی و حاضیرکی دؤورده یئنیدن ایشه باشلاماغین چتین اولدوغونو بیلدیریب‌لر.
ساغلیق رسمیلری اوردو‌نون خسته‌خانا‌داکی بوتون طبی لوازیماتلاری، همچنین عملیات و یوغون باخیم اوتاقلارینی محو ائتدیگینی بیلدیریب‌لر.
ایسرائیل گوجلری غزه زولاغینین ان بؤیوک ساغلیق کومپلکسی اولان شفا خسته‌خانا‌سینی ضبط ائتدیکدن 10 گون سونرا، نوامبرین 24-ده خسته‌خانا‌نین بعضی حیصه‌‌لر‌ینی داغیداراق گئری چکیلمیشدی.
