پسکوو:"روسیا و ناتو حاضیردا بیرباشا قارشیدورما ایچریسیندهدیر"
کرملین سؤزچوسو دمیتری پسکوو بیلدیریب کی، روسیا و ناتو حاضیردا "بیرباشا قارشیدورما" ایچریسیندهدیر
کرملین سوزچوسو دمیتری پسکوو: "روسیا و ناتو حاضیردا بیرباشا قارشیدورما ایچریسیندهدیر. ناتو آرتیق اوکراینا‌داکی موناقیشه‌ده ایشتیراک ائدیر، سرحدلریمیزه دوغرو ایره‌لیلمه‌یه و بیزه یاخین یئرلرده حربی آلت یاپینین گئنیشلندیرمه‌یه چالیشیر"، - دئییب.
خاطیرلاداق کی، بوندان اول روسیا پرزیدنتی ولادیمیر پوتین دفعه‌لرله "سویوق محاربه"دن سونرا باتی‌نین روسیانی آلداتدیغینی، "ورشو سازیشی" تشکیلاتی‌نین داغیلماسینا باخمایا‌راق، ناتو-نون گئنیشلنمه‌یه داوام ائتدیگینی و کئچمیش شوروسی اؤلکه‌لرینی اؤز تأثیر دایره‌سینه سالدیغینی دئمیشدی. باتی ایسه بو اتهام‌لاری رد ائدیر، ناتو-نون ساوونما بیرلیگی اولدوغونو و ناتویا قوشولماغین اؤلکه‌لرین دموکراتیک قراری اولدوغونو بیلدیریر.
قئید ائدک کی، ناتو روسیانین ایشغا‌لی شرایطینده اوکراینانی ساغ قالماسی اوچون دستکله‌دی و رسمی کیئوه یالنیز سلاح، تعلیم و کشفیات یاردیمی ائتدیگینی بیلدیریب. روسیانین فیکرینجه ایسه بو، ناتو-نو فاکتیکی اولا‌راق موناقیشه طرفینه چئویریب. 2024-جو ایلین فوریه آییندا ولادیمیر پوتین دئییب کی، "روسیا ایله ناتو آراسیندا بیرباشا موناقیشه اولارسا، یئر اوزو اوچونجو دونیا محاربه‌سی‌نین آستاناسیندا اولار".
