اسماعیل هنیهنین ۳ اوغلو و ۴ تورونو اسرائیل سالدیریسیندا اؤلدو
"اوشاقلاریم غزهده قالدیلار و غزهنی ترک ائتمهدیلر. بوتون خالقیمیز اؤولادلارینین قانلارییلا بؤیوک بیر بدل اؤدییر. من ده اونلاردان بیرییهم"
ایسرائیلین غزه شهرینین باتیسینداکی الشاطی سیغینماچی دوشرگهسینده حرکت حالینداکی بیر ماشینی هدف آلماسی نتیجهسینده حماس سیاسی دفتری باشقانی اسماعیل هنیهنین ۳ اوغلو و ۴ تورونو/نوهسی حیاتینی ایتیردی.
شاهیدلردن آلینان بیلگییه گؤره ایسرائیل، رمضان بایرامی سببی ایله الشاطی سیغینماچی دوشرگهسی ساکینلری و یاخینلارییلا بایراملاشماغا گئدن هنیهنین عائلهسیندن بیر چوخ فردین اولدوغو بیر ماشینی هدف آلدی.
حماسدان وئریلهن آچیقلامادا، هنیهنین عائلهسینین، دوشرگه ساکینلری و یاخینلارینین بایرامینی قوتلاماق اوچون گزدیکلری ماشینین هدف آلینماسی نتیجهسینده ایچریسیندهکیلرین هامیسینین اؤلدوگو و یا یارالاندیغی قید ائدیلدی.
آچیقلامادا، رمضان بایرامینین ایلک گونو شاطی سیغینماچی دوشرگهسینده "خائن و قورخاقجا" تشکیل ائدیلهن سالدیریدا، هنیهنین حازم، امیر و محمد آدلی اوشاقلاری ایله مونا، آمال، خالد و رزان آدلی نوهلرینین حیاتینی ایتیردیگی بیلگیسی پایلاشیلدی.
بو جور سالدیریلارین، حماس و فیلیسطین خالقینین مقاومت ایرادهسینی قیرماغی باجارابیلمهیهجگی؛ یالنیز اونلارین موباریزهدهکی قرارلیلیغینی آرتیراجاغی وورغولاندی.
بو آرادا، هنیهنین، ایسرائیلین اوغوللارینین و نوهلرینین اولدوغو آراجا تشکیل ائتدیگی هوجومون آردیندان وئردیگی آچیقلاما الجزیره تلویزیون کانالیندا یاییملاندی.
حماس لیدئری، "اوشاقلاریمین شهادتیندن اؤترو اللهآ شکر ائدیرهم" ایفادهلرینی ایشلهدرک،
"اوشاقلاریم غزهده قالدیلار و غزهنی ترک ائتمهدیلر. بوتون خالقیمیز اؤولادلارینین قانلارییلا بؤیوک بیر بدل اؤدییر. من ده اونلاردان بیرییهم" دئدی.
ایسرائیلین، لیدئرلرین اوشاقلارینی هدف آلاراق فیلیسطینلیلرین قرارلیلیغینی قیراجاغینی ساندیغینی آنجاق بو تؤکولهن قانین، فیلیسطین تورپاغینا باغلیلیقداکی فرارلیلیقلارینی آرتیراجاغینی ایفاده ائدن هنیه،
"عائلهمین ۶۰آ یاخین فردی ساواشدا شهید اولدو و اونلار و خالقیمیز آراسیندا هئچ بیر فرق یوخ. ایتکیلریمیز نه قدر بؤیوک اولورسا اولسون، ایسرائیلین ائتدیگی شانتاژا بویون ایمهیهجییک، امتیاز وئرمهیهجییک" ایفادهلرینی ایشلتدی.
هنیه آیریجا "ایسرائیلین یئریندن ائدیلمیش شخصلرله دولو رفح شهرینی ایشغال یولونداکی تهدیدلرینین فیلیسطین خالقینی و دیرنیشینی قورخوتمادیغینی" وورغولادی.