گورجوستان قاریشدی
اقتدارداکی گورجو خیالی پارتیسینین پارلمانا سوندوغو "خاریجی تأثیرین شفافلیغی" قونولو قانون لایحهسینه قارشی اعتراضلار داوام ائدیر
گورجوستاندا، "خاریجی تأثیرین شفافلیغی" قونولو قانون لایحهسی قارشیدی گؤستریده، گوونلیک گوجلری ایله گؤستریچیلر آراسیندا قالماقال چیخدی.
اؤلکهده، اقتدارداکی گورجو خیالی پارتیسینین پارلمانا سوندوغو "خاریجی تأثیرین شفافلیغی" قونولو قانون لایحهسینه قارشی اعتراضلار داوام ائدیر.
باشکند تیفلیسده گئجه ساعاتلاریندا توپلانان مینلرجه وطنداش، جمهوریت میدانیندان پارلمان بیناسینا قدر یئریدی.
سؤزو گئدن قانون لایحهسینه قارشی چیخان گؤستریچیلر، گورجوستان و آوروپا بیرلیگی بایراقلاری ایله قانون لایحهسی قارشیدی پلاکاردلار داشیدی.
لایحهنین قانونلاشماسی دوروموندا اؤلکهنین آوروپا بیرلیگی ایله قایناشما سۆرهجینین منفی تاثیرلهنهجگینی ساوونان گؤستریچیلر، "آوروپایا هه، روس یاساسینا یوخ" شعارلاری وئردی.
گؤستریچیلرین، پارلمان بیناسی قارشیسیندا حکومتین تشکیل ائدجگی بیر فعالیت چرچیوهسینده قورولان و انگللرله قورونان صحنهیه گیرمک ایستهمهسینه پلیس ایجازه وئرمهدی.
گوونلیک گوجلری ایله گؤستریچیلر آراسیندا آرا آرا قالماقال یاشاندی. پلیس، بیبر گازییلا گؤستریچیلره موداخیله ائتدی.
پارلمان بیناسینین گیریشلرینی باغلایان پلیس، گؤستریچیلرین بینانین اطرافیندا اینسان زنجیری میدانا گتیرمهسینه ایجازه وئرمهدی.
پارلمان اکثریتی لیدئری ماموکا مدینارادزه، تخمیناً ایکی هفته اؤنجه وئردیگی آچیقلامادا، گورجوستاندا فعالیت گؤسترهن مدنی قورولوشلارین مالیهلشدیریلمهسینین یوزده ۹۰یندان چوخونون شفاف اولمادیغینی دیله گتیرمیشدی.
اؤلکهسیندهکی اولوسلارآراسی مالی قورولوشلارین گورجوستانداکی مدنی قورولوش و مئدیا کیمی قورولوشلارا تامین ائتدیکلری مالی دستک حاقیندا شفاف بیلگی آلینماسینین ممکن اولدمادیغینی ایفاده ائدن مدینارادزه، "خاریجی تأثیرین شفافلیغی" قونولو یاسا لایحهسینی یئنیدن سونماغا قرار وئردیکلرینی بیلدیرمیشدی.