آی یولچولوغو ائرته‌لندی
ناسا باشقانی بیل نلسون: گۆونلیک بیزیم ان اؤنملی اؤنجه‌لیگیمیزدیر
آمریکا بیرلشمیش دؤولتلری اولوسال هاواچیلیق و اوزای آژانسینین (ناسا)، بیلیمسل آراشدیرمالار آپارماق اوزره آیا آسترونوت گؤندریلمه‌سینی اؤن گؤرن آرتمیس گؤره‌وینده، خدمه‌نین آیا ائنیشی ۲۰۲۶ ایلینه ائرته‌لندی.
ناسادن وئریله‌ن یازیلی آچیقلامادا، اوزای آراجی ایله باغلی گۆونلیک قایغیلارینین یانیندا آسترونوتلارین گئییمی و ائنیش آراجلارییلا باغلی پروبلئملر یاشاندیغی ایفاده ائدیلدی.
آچیقلامادا، بو چرچیوه‌ده آسترونوتلارین آیا ائنیشینین سپتامبر ۲۰۲۶یا ائرته‌لندیگی بیلگیسی وئریلدی.
پروژه‌نین تاریخینده‌کی دییشیکلیگین باشلیجا سببینی "خدمه گۆونلیگی" اولدوغو وورغولانان آچیقلامادا، اکیبلرین بوتون چتینلیکلری دقتله اله آلدیغی ایفاده ائدیلدی.
ناسا باشقانی بیل نلسون، "گۆونلیک بیزیم ان اؤنملی اؤنجه‌لیگیمیزدیر" دئدی.
نلسون، سؤزو گئدن گئجیکمه‌لرین آرتمیس اکیبلرینه چتینلیکلری آشماق اوچون داها چوخ زامان قازاندیراجاغینی قید ائتدی.
آرتمیس گؤره‌وی باغلامیندا آیا بیلیمسل آراشدیرمالار آپارماق اۆزره ۴ آسترونوت گؤندریلمه‌سی پلانلانیر.
آمریکا، عینی پروگرام چرچیوه‌سینده آیدا قالیجی بیر مرکز قورولماسی و آیین هم مارس سفری اوچون بیر دوراق اولاراق ایستیفاده ائدیلمه‌سی هم ده بورادا دگرلی معد‌نلرین چیخاریلماسینی اؤن گؤرور.
