۶۶ میلیون ایل اؤنجه یاشامیش بیر کرتنکه‌له فسیلی تاپیلدی
اینگیلتره‌ده‌کی باث بیلیم‌یوردوندان آراشدیرماچیلار، مراکشین خوریبکه شهرینده‌کی بیر مده‌نده تاپدیقلاری اسکلت قالیقلارینی آراشدیردی
مرکشده، ۶۶ میلیون ایل اؤنجه اقیانوسدا یاشامیش بیر دنیز کرتنکه‌له‌سی نؤوعونه عاید اسکت قالیقلاری تاپیلدی.
بی‌بی‌سی‌نین خبرینه گؤره، اینگیلتره‌ده‌کی باث بیلیم‌یوردوندان آراشدیرماچیلار، مراکشین خوریبکه شهرینده‌کی بیر مده‌نده تاپدیقلاری اسکلت قالیقلارینی آراشدیردی.
فسیللرین تخمیناً ۸ متر اوزونلوغوندا، "قورخونج اوزو و بیچاق کیمی دیشلری" اولان موسازور تؤره‌مه‌سیندن یئنی بیر نؤوعه عاید اولدوغونو تعیین ائد‌ن آراشدیرماچیلار، بو دنیز کرتنکه‌له‌سینین، مراکش ساحللرینده، اطلس اقیانوسوندا غذا زنجیرینین تپه‌سینده‌کی ییرتیچیلاردان بیری اولدوغونو ایفاده ائتدی.
قالیقلاری تاپیلان دنیز کرتنکه‌له‌سینین تخمیناً ۶۶ میلیون ایل اؤنجه تیرانوساوروس رکس (ت-رکس) کیمی دایناسورلارلا عینی دؤنمده یاشامیش اولابیله‌جگیینی بیلدیرن آراشدیرماچیلار، ایتی دیشلری سببی ایله بو موسازور نؤوعونه "خینژاریا آکوتا" آدینی وئردی.
بیلیم اینسانلاری، بو آدی، عربجه "خنجر" معناسینی وئره‌ن "خینژار" و لاتینجا "ایتی" معناسینی وئره‌ن "آکوتا" سؤزلرین بیرلشمسی ایله اولوشدوردو.
موسازورلارین، دایناسورلار دؤنمینده آنتارکتیکادا یاشایان و نسلی تۆکه‌نه‌ن بؤیوک دنیز سۆرونگنلری اولدوغو ایفاده ائدیلیر.
آراشدیرمانین نتیجه‌سی، "ساینس دایرکت" آدلی اینترنت سایتیندا یاییملاندی.
