هیندوستان "آکسفورد-آسترازنکا" آشی‌نین صادراتینی دایاندیریب

هیندوستان "آکسفورد-آسترازنکا" یئنی نوع کوروناویروس (کووید-19) علیهینه آشی‌نین صادراتینی یولوخما حال‌لاری‌نین آرتماسی ایله اؤلکه داخیلینده احتیاج دویولماسی سببیندن موقتی دایاندیرماغا قرار وئریب.

بی بی سی-ده‌کی خبره گؤره، هیندوستان خاریجی ایشلر ناظیرلیگی‌نین صلاحیت‌لی‌لری اؤلکه‌ده یولوخما حال‌لاری‌نین آرتماسی نتیجه‌سینده هیندوستان سروم اینستیتوتو طرفیندن اوره تیلن "آکسفورد-آسترازنکا" آشی‌سی‌نین دیگر اؤلکه‌لره صادراتی‌نین موقتی دایاندیریلدیغینی آچیقلاییب.

صلاحیت‌لی‌لر آرتان یولوخما حال‌لار سببیله آشی‌نین اؤلکه داخیلینده ایستیفاده‌سینه احتیاج دویولدوغونو بیلدیریب.

بو وضعیتین دیگر اؤلکه‌لره آشی لارین آوریل سونونا قدر چاتدیریلماسیندا بیر قدر گئجیکمه‌یه سبب اولا بیله‌جگی قئید ائدیلیب.

هیندوستان ساغلیق ناظیرلیگی‌نین وئردیگی آچیقلامایا گؤره، سون 24 ساعات عرضینده 47 مین 262 یئنی یولوخما آشکار ائدیلیب. سون 24 ساعات عرضینده 275 نفرین اؤلومو ایله ویروس سببیله اؤلن‌لرین سایی 160 مین 441-ا یوکسلیب.

دیگر طرف‌دن، هیندوستانین باتی ایالت‌لرینده "کووید-19"ون "قوشا موتانت" واریانتی آشکار ائدیلیب.