یونیسف: فیلیسطینده اوشاق اؤلوملرینه سون قویولمالی
یونیسفین یاخین شرق و قوزئی آفریقا اوزره بؤلگهسل دیرئکتورو عادله خدر طرفیندن وئریلن آچیقلامادا فیلیسطینده اوشاق اؤلوملرینه سون قویولمالی و آتیشکسه نایل اولونماسینین واجیبلیگینی وورغولاندی
بیرلشمیش میللتلر تشکیلاتینین اوشاق فونو (یونیسف) فیلیسطین اراضیلرینده اوشاق اؤلوملرینه سون قویولمالی اولدوغونو بیان ائدیب.
یونیسفین یاخین شرق و قوزئی آفریقا اوزره بؤلگهسل دیرئکتورو عادله خدر طرفیندن وئریلن آچیقلاما یونیسفین ایکس سوسیال مئدیا حئسابیندا درج اولونوب.
خدر، ایسرائیلین سون 72 ساعاتدا اردن چایینین باتی ساحیلینین طولکرم شهرینده 3، غزهنین گونئییندهکی رفح شهرینده ایسه ان آزی 14 اوشاغی اؤلدوردویونو بیلدیریب.
فیلیسطین تورپاقلارینداکی اوشاقلارین چوخ اوزون مودتدیر فاجیعهلی و شیدتلی زوراکیلیق دؤورونون ایچینده قالدیغینی قید ائدن خدر، فیلیسطینده اوشاق اؤلوملرینه سون قویولمالی و آتیشکسه نایل اولونماسینین واجیبلیگینی وورغولادی.
ایسرائیل اوردوسونون رادیوسو آوریلین 18-ده اردن چایینین باتی ساحیلینین قوزئیینده یئرلشن طولکرم شهریندهکی نور شمس قاچقینلار دوشرگسینه قارشی "گئنیش میقیاسلی حربی عملیات" باشلادیغینی اعلان ائدیب.
ایسرائیل عسگرلرینین نور شمس قاچقینلار دوشرگسینه تشکیل ائتدیگی هوجوملاردا 14 فیلیسطینلینین حیاتینی ایتیردیگی بیلدیریلیب.
حادیثه شاهیدلری ایسرائیل اوردوسونون دوشرگیه باسقینین دونن گئجه باشا چاتدیغینی و بؤلگهدن گئری چکیلدیگینی بیلدیریب.
ایلگیلیلی خبرلر
فیلیپپینده 5.7 ریشتر گوجونده زلزله
آمریکا ژئولوژی خیدمتینین معلوماتینا گؤره، 5.7 ریشتر گوجونده زلزله 7.9 کیلومتر درینلیکده قیده آلینیب