گوندم آنالیز: 48
برگزیت پروسه‌سی
2016 -جی ایلین ژوئن آییندا اینگیلتره خالقی اؤلکه‌لری‌نین آوروپا بیرلیگیندن چیخماسینا دایر قرارا رفرندوم نتیجه‌سینده گلدی. اؤلکه‌ده خالقین بو سئچیمیندن سونرا اینگیلتره حکومتی آوروپا بیرلیگی و بیرلیگین دیگر 27 عضو اؤلکه‌سیله موذاکیره‌لر آپاردی. بیر چوخ اینگیلیس ناظیرین ایستعفا ائتدیگی پروسه سین نتیجه‌سینده اینگیلتره و آوروپا بیرلیگی آراسیندا 600 صحیفه‌دن عبارت بیرلیگدن چیخما سازیشی قبول ائدیلدی. 25 نوامبردا طرف‌لرین قبول ائتدیگی سازیش متنی 11 دسامبردا اینگیلتره پارلامئنتینده تصدیقلنمه‌لی‌دیر. پارلامئنتده بیر چوخ میللت وکیلی سازیشی قبول ائتمه دیک‌لرینی و تصدیقلمه‌یه‌جک‌لرینی بیلدیردی. بونونلا دا سازیشین تصدیقلنمه‌سی مسئله‌سی تهلوکه ایله اوزلشدی.
اینگیلتره‌نین آوروپا بیرلیگیندن چیخاجاغی تاریخه ده ک طرف‌لر آراسیندا سازیش ایمضالانیب پارلامئنت طرفیندن تصدیقلنمه‌یه‌جگی تقدیرده اینگیلتره آوروپا بیرلیگیندن سرت شکیلده چیخا‌جاق. بونا مانع اولماق اوچون ترزا می ین ایداره ائتدیگی اینگیلتره حکومتی ایله آوروپا بیرلیگی آراسیندا قرارا آلینان سازیش متنی ایله اهمیت‌لی آددیم آتیلمیش‌دیر. آوروپا بیرلیگینه عضو اؤلکه‌لر اینگیلتره‌نین چیخماسیندان کدرلندیک‌لرینی ایفاده ائتمه‌لرینه باخمایا‌راق، سازیش قبول ائدیلمه‌سیندن دویدوق‌لاری راحت‌لیغی دیله گتیردی‌لر. خصوصیله اینگیلتره‌نین بیرلیگدن چیخماسیندان سونرا باشقا اؤلکه‌لرین ده چیخماسی‌نین قارشی‌سینی آلماق اوچون اینگیلتره‌نین قارشی‌لیق‌سیز اولا‌راق آوروپا بیرلیگیندن الده ائتدیگی قازانج‌لاردان اؤنملی میقیاسدا محروم قالماسینا سعی گؤستردیک‌لری گؤرونور.
آوروپا بیرلیگینه عضو اؤلکه‌لر آراسیندا ایسپانیا "برگزیت" سازیشی‌نین اوزون مودت علیهینه اولدو. ایسپانیانین گونئی ینده کی جبل الطارق بؤلگه‌سی‌نین موضعی ایسپانیا حکومتی‌نین وتو تهدیدینه سبب اولدو. جبل الطارق 1713-جو ایلدن بری اینگلیتره‌یه باغلی اولماسینا باخمایا‌راق، ایسپانیا حکومتی جبل الطارق اوزرینده حاق ادعا ائتمگی داوام ائتدیریر. "برگزیت" سازیشی‌نین ماده‌لری آراسیندا سرحد کئچیدلری‌نین معین ائدیلمه‌سی ایسپانیایا جبل الطارق نقطه‌سینده تأثیر ائده‌جک‌دیر. بونا گؤره ایسپانیا حکومتی اعتراضلارینی آوروپا بیرلیگی نوماینده‌لرینه بیلدیردی و بونونلا باغلی ضمانت‌لر آلدیقدان سونرا وتو حقوقون‌دان ایستیفاده ائتمک‌دن ایمتینا ائتدی.
اینگیلتره‌نین آوروپا بیرلیگیندن چیخماسی ایله قورودا یارانا‌جاق دیگر بیر سرحد ایسه ایرلاندیا ایله شیما‌لی ایرلاندیا آراسیندا‌دیر. ایکی بؤلگه آراسیندا سرت بیر سرحد کئچید منطقه‌سی ایستمه‌ین طرف‌لر 2020-جی ایله ده ک کئچید دؤورو اولماسینی و ایرلاندیا اوچون خصوصی حل یولو تاپماغی قرارا آلدی. بو چرچیوه‌ده اینگیلتره کئچید دؤورونده آوروپا بیرلیگی-نین گؤمروک بیرلیگی داخیلینده یئر آلا‌جاق، اما آوروپا بیرلیگی داخیلینده سؤز سؤیلمک حقوقو اولمایا‌جاق.
اینگیلتره و آوروپا بیرلیگی آراسینداکی "برگزیت" سازیشی‌نین اینگیلتره پارلامئنتینده قبول ائدیلمه‌مه احتیمالی یوکسک دیر. باخمایا‌راق عمومی اولا‌راق بیر نئچه جهت‌دن بیر ایلک تشکیل ائدیر. باشقا بیر نومونه‌سی اولمایان "برگزیت" سازیشی ساده‌جه اینگیلتره‌نین آوروپا بیرلیگی ایله دئییل، همین زاماندا باشقا آوروپا بیرلیگینه داخیل اولمایان و اولا بیلمه‌ین اؤلکه‌لر اوچون ده نومونه تشکیل ائده بیلر. بو چرچیوه‌ده تورکیه و بالکان اؤلکه‌لری‌نین آوروپا بیرلیگی ایله عضولوق موذاکیره‌لری داوام ائتمه‌یه‌جگی تقدیرده اینگیلتره ایله آوروپا بیرلیگی آراسیندا قبول ائدیلن سازیش نومونه کیمی ایره‌لی سوروله‌رک، فرق‌لی بیر طرفداش‌لیق قورولا بیلر.
دیگر طرف‌دن اینگیلتره‌نین آوروپا بیرلیگیندن چیخماسی موختلیف ژئو سیاسی مسئله‌لره اؤز تأثیرینی گؤستره‌جک. روسیانین دوغو آوروپا-دا آوروپا بیرلیگی علیهینه اولان تأثیر دایره‌سی موباریزه‌سینده اینگیلتره کیمی اهمیت‌لی بیر اؤلکه‌نی ایتیرن آوروپا بیرلیگی کئچمیشله موقاییسه‌ده داها ضعیف موضع ده اولا‌جاق. همچنین آوروپا اردوسونون موذاکیره اولوندوغو بیر زاماندا اینگیلتره کیمی آوروپانین ان گوجلو اردوسونا صاحب بیر اؤلکه‌نین آوروپا بیرلیگیندن چیخماسی آوروپا اردوسو فیکریله باغلی ناراحات‌لیق‌لاری و شوبهه‌لری گوجلن‌دیره‌جک‌دیر. دیگر طرف‌دن اینگیلتره‌نین آوروپا بیرلیگیندن چیخماسی ایله آوروپا‌داکی گوج بالانس‌لاری و اتفاق‌لارین دییشمه‌سی گوندمه گله بیلر. آوروپا بیرلیگی طرف‌دن روسیا، افریقا و تورکیه-یه قونشو ایکن، اینگیلتره‌نین بیرلیگدن چیخماسی ایله قوزیی ده یئنی بیر قونشویا صاحب اولا‌جاق‌دیر.
تورکیه‌نین گوندمینه دایر تحلیل پروقرامی‌نین نوبتی بؤلومونده سیاست، ایقتیصادیات و جمعیت آراشدیرما‌لاری فوندونون امکداشی جان آجونون " برگزیت پروسه سی " باش‌لیق‌لی آنالیتیک یازی‌سینی تقدیم ائتدیک.
