گوندم آنالیز: 49
G-20 ذیروه سی و ولیهد شاهزاده محمد بن سلمان
آرژانتین-ده کئچیریلن G-20 ذیروه سینده دونیا لیدرلری بیر آرایا گلدی و یوکسک سویه‌لی گؤروش‌لر کئچیریلدی. ایکی طرف‌لی گؤروش‌لرین اؤن پلاندا اولدوغو ذیروه ده امریکا و چین آراسینداکی ایقتیصادی ساواش و ایستانبول-دا سعودیه عربیستانی‌نین کونسوللوغوندا ژورنالیست خاشقچی‌نین اؤلدورولمه‌سی گؤستریشینی وئرمکده شوبهه‌لی بیلینن بو اؤلکه‌نین ولیهد شاهزاده سی محمد بن سلمانین وضعیتی دیگر اهمیت‌لی موضوع لاردان اولدو.
سعودیه عربیستانی‌نین ایستانبول کونسوللوغوندا ایشلنن جینایت‌دن سونرا تورکیه رسمی‌لری‌نین اوغورلو سوروشدورماسی و اولوسلار آراسی ایجتیماعتین تضییقیندن سونرا سعودیه عربیستانی رسمی‌لری جینایتی قبول ائتمک مجبوریتینده قالدی. واشینگتن پست یازیچی‌سی جمال خاشقچی‌نین اؤلدورولمه‌سینده گوناهلان‌دیریلان سعود عدلیه‌سی طرفیندن موحاکیمه پروسه‌سی باشلانماسینا باخمایا‌راق، اؤلوم گؤستریشی‌نین کیمین طرفیندن وئریلدیگی ایستینتاق ائدیلیر. سعودیه عربیستانی طرفی حادثه‌نی بعضی صلاحیت‌لی‌لرین تشببوسو کیمی گؤسترسه ده ایشاره‌لر سعودیه عربیستانی‌نین ولیهد شاهزاده سی محمد بن سلمانی گؤستریر. نتیجه‌ده امریکا میللی کشفیات ایداره‌سی سوروشدورما دا سلمانین جینایتین آرخاسینداکی شخص اولدوغو قناعتینه گلیندیگینی مطبوعاتا سیزدیردی.
بوتون بو پروسه داوام ائدرکن سعودیه عربیستانی‌نین ولیهد شاهزاده سی اول عرب اؤلکه‌لرینه سفره چیخدی، سونرا ایسه آرژانتین-ده کئچیریلن G-20 ذیروه توپلانتیسینا قاتیلدی. عرب دونیاسینداکی امیرلری و کرال‌لاری زیارت ائدن محمد بن سلمان سون اولا‌راق دموکراسی ایله ایداره اولونان تونیسا گئتدی و گئنیش کوتله‌لرین اعتراضلارینا سبب اولدو. محمد بن سلمانین تونیسه سفرینه عرب‌لر طرفیندن ان آغیر شکیلده اعتراض ائدیلرکن، ولیهد شاهزا‌دنی خاشقچی جینایتینده مسئولیت‌لی گؤسترن شعارلار دقت چکدی.
تونیسه سفریندن سونرا G-20 ذیروه سینه قاتیلان محمد بن سلمانین قالماق اوچون سئچیمی آرژانتین-ده اؤلکه‌سی‌نین سفیرلیگی اولدو. آرژانتین ولیهد شاهزاده‌یه قارشی خاشقچی جینایتینه دایر جینایت مراجعتی‌نین ائدیلمه‌سی و آرژانتین محکمه‌سی‌نین بو محکمه ایشینی قبول ائتمه‌سی دقت چکدی. محمد بن سلمانین G-20 ذیروه سینده قاتیلیمی زامانی بیر چوخ دونیا لیدرلری ولیهد شاهزاده ایله عینی یئرده اولماماق اوچون سعی گؤستردی. آز سایدا ایکی طرف‌لی گؤروش‌لر کئچیرن محمد بن سلمانی فرانسا پرزیدنتی ماکرون کامئرا‌لار قارشی‌سیندا سؤین کیمی قینادی. دیگر طرف‌دن روسیا پرزیدنتی پوتین محمد بن سلمان ایله خیلی صمیمی شکیل‌لر چکدیردی.
G-20 ذیروه سینین باشا چاتماسیندان سونرا خاشقچی جینایتی و محمد بن سلمان مسئله‌سینده امریکا-دا اؤنملی بیر وضعیت باش وئردی. میللی کشفیات ایداره‌سی سناتین بیر سیرا قاباقجیل عضو‌لرینه خاشقچی جینایتیله علاقه‌لی خصوصی بریفینگ وئردی. مطبوعاتا قابا‌لی کئچیریلن بریفینگدن سونرا مطبوعاتا آچیقلاما وئرن سناتور کورکر و گراهام خاشقچی جینایتیندن محمد بن سلمانین مسئول اولدوغو نقطه‌سینده هر هانسی شوبهه‌لری‌نین اولمادیغینی ایفاده ائتدی‌لر. آیریجا تورکیه محکمه‌سی‌نین آلدیغی سون قرارلا محمد بن سلمانین ان یاخینلیغینداکی ایکی نفر باره‌سینده توتولما قراری چیخاریلماسی محمد بن سلمان اوچون چنبرین گئده‌رک دارالدیغینی گؤستریر.
G-20 ذیروه سینین دیگر اؤنملی بیر مسئله سی ایسه امریکا و چین خالق جمهوریتی آراسیندا داوام ائدن ایقتیصادی ساواش اولدو.امریکانین چین ایله آپاردیغی تیجارتده جدی بیر واردات-صادرات بالانسی‌نین اولماماسی امریکا رهبرلیگینی ناراحات ائتدی و ترامپ اساس قورولوشدا دییشیک‌لیک ائتمک اوزینه چینه قارشی جزا تحریم لری تطبیق ائتمگی قرارا آلدی.
امریکا پرزیدنتی‌نین بو قراری قارشی‌سیندا چین-ین ده امریکا مال‌لارینا قارشی تحریم تطبیق ائتمه‌سی ایکی اؤلکه آراسینداکی ایقتیصادی موباریزنی رسمیلشدیردی. خیلی بؤیوک رقم‌لرله اینکیشاف ائدن چین ایقتیصادیاتی‌نین امریکانین دونیاداکی موضعینی تهدید ائده‌جک سویه‌یه چیخماسی بو چرچیوه‌ده اهمیت‌لی‌دیر. خصوصیله امریکا-داکی بیر سیرا شیرکت‌لرین اوره تیمینی چین-ده آپارماسی ایکی اؤلکه آراسینداکی رقابتی گوجلندیردی.
تورکیه‌نین گوندمینه دایر تحلیل پروقرامی‌نین نوبتی بؤلومونده سیاست، ایقتیصادیات و جمعیت آراشدیرما‌لاری فوندونون امکداشی جان آجونون " G-20 ذیروه سی و ولیهد شاهزاده محمد بن سلمان" باش‌لیق‌لی آنالیتیک یازی‌سینی تقدیم ائتدیک.
