میکلانژین گیزلی اوتاغی خالقا آچیلاجاق
میکل‌آنجلو بوئوناروتینین ۴۸ ایل اؤنجه کشف ائدیله‌ن و "گیزلی سیغیناغی" اولاراق تانیملانان اوتاغی، خالقا آچیلماغا حاضرلانیر
رنسانس دؤنمی ایتالیالی صنعتچیلردن میکل‌آنجلو بوئوناروتینین فلورانس شهرینده‌کی گیزلی اوتاغی خالقا آچیلاجاق.
ایتالیا مطبوعاتینداکی خبرلره گؤره، دؤنمینین اؤنده گلن رسام، هیکل‌تراش و معماری اولان میکلانژین فلورانسداکی مدیجی شاپل/قصرلرینده ۴۸ ایل اؤنجه کشف ائدیله‌ن و "گیزلی سیغیناغی" اولاراق تانیملانان اوتاغی، خالقا آچیلماغا حاضرلانیر.
دووارلاریندا میکلانژا عطف ائدیله‌ن بعضی قاراقلم شکیللر اولدوغو ایفاده ائدیله‌ن اوتاق، ۱۵ نوامبر-۳۰ مارس آراسیندا، اؤنجه‌دن رزرواسیون ائد‌نلره آچیلاجاق. اوتاغا عینی آندا یالنیز ۴ نفر گیره‌بیله‌جک.
اوتاغا آلیناجاق قوناق ساییسی هفته‌لیک ۱۰۰ نفر ایله سینیرلی اولاجاق و اوتاقدا قالما مدتی ۱۵ دقیقه‌دن اوزون اولمایاجاق.
۱۴۷۵-۱۵۶۴ ایللرینده یاشایان میکلانژین، دؤنمین پاپی ۷.جی کلمنتین اؤفکه‌سیندن قاچماق اوچون بو اوتاغی یاپدیغی و بیر مدت بورادا قالدیغی ایر‌لی سورولموشدو.
گیزلی اوتاق، ۱۹۷۵ده ائدیله‌ن اوناریم سیراسینداکی تمیزلیک ایشلرینده کشف ائدیلمیش و دؤنم دؤنم قوناق قبولونا آچیلمیشدی.
میکلانژین گیزلی اوتاغی، ۱۹۷۵ اؤنجه‌سینده ایسه مدیجی شاپللرینین آلتیندا آنبار اولاراق ایستیفاده ائدیلمیشدی.
