ترت اینسانی فیلم فستیوالی اؤدوللری صاحبلرینه وئریلدی
بیرینجیلیک اؤدولونو ماجاریستاندان آکوس کواچ قازانارکهن، ایراندان علیرضا کاظمیپور ایکینجی، کوزووادا سامیر کاراهودا اوچونجو اولدو
تورکیه رادیو تلویزیون قورومونون (ترت) ۵.جی دفعه تشکیل ائتدیگی ترت وورلد سیتیزن هیومنیترین فیلم فستیوالیندا (اینسانی فیلم فستیوالی) اؤدوللر مراسیمله صاحبلرینه وئریلدی.
فستیوالدا درجهیه گیرهنلره اؤدوللری ایلهتیشیم باشقانی فخرالدین آلتون و ترت باش مودورو محمد زاهید سوباچی ایله ترت یؤنهتیمی طرفیندن وئریلدی.
بیرینجیلیک اؤدولونو ماجاریستاندان آکوس کواچ قازانارکهن، ایراندان علیرضا کاظمیپور ایکینجی، کوزووادا سامیر کاراهودا اوچونجو اولدو.
آیریجا "ایقلیم فرقیندهلیگی" و ترت اؤزل اؤدولو ده تقدیم ائدیلدی.
ترت اؤزل اؤدولو؛ دونیانین قانایان یاراسی غزه اوچون وئریلدی. اؤدولو، فیلیسطینلی یؤنتمن احمد صالح آلماغا حاق قازانارکهن، یؤنتمن مراسیمه قاتیلابیلمهدی.
مراسیمده دانیشان ایلهتیشیم باشقانی فخرالدین آلتون، فستیوالین، ترتنین "اؤزو سؤزو اینسان" آنلاییشییلا ایجرا ائتدیگی یایین سیاستینین ان اؤنملی گؤستریجیسی اولدوغونو وورغولادی.
آلتون، "بوتون دونیانین اقتصادی بحرانلار، سالقینلار، قیتلیق، ایقلیم دییشیکلیگی و داوام ائدن چاتیشمالار سببی ایله سون درجه حساس بیر آشامادان گئچدیگی ایندیکی زاماندا، آجیلی و چارهسیزلیک ایچیندهکی میلیونلارجا اینسانا، صنعتین گوجو ایله دقت چکهن بو فستیوالی سون درجه دگرلی گؤرورم" دئدی.
تورکیهنین، قلوبال مسئلهلرده اینسانی اؤلچویه بؤیوک اؤنم وئردیگینی، ترتنین بو ایستیقامتدهکی قاتقیسینین اؤنملی اولدوغونو ایفاده ائدرک ترت یؤنهتیمینه تشکر ائدن فخرالدین آلتون،
"ترت وورلد سیتیزن هیومنیترین فیلم فستیوالی دا تورکیهنین بو قونوداکی حساسلیغینین تشکیلاتی تظاهرلاریندان بیری اولاراق اوخونمالیدیر" ایفادهسینی ایشلتدی.
ایسرائیلین غزه یولاغینا قارشی سالدیریلارینا توخونان ایلهتیشیم باشقانی، ایسرائیلین هئچ بیر حقوق تانیمایان اینسانلیق دیشی ائیلملرینین بؤیوک بیر ظلمو و سیستماتیک بیر قیرغینی اؤزو ایله گتیردیگینی ایفاده ائدرک، "ایللرجه 'فیلیسطین پروبلئمی' دئیه بیر پروبلئمدن بحث ائدیلدی. یوخ پروبلئمین آدی ایسرائیل پروبلئمیدیر. یالنیز اورتا دوغو دئییل، یالنیز بؤلگهمیز، یالنیز جغرافیامیز دئییل، بوتون دونیا بو پروبلئمله اوزلشمکدهدیر" دئدی.
ترت باش مودورو سوباچی دا "قیشقیریقلاری دویولمایان اینسانلارین حکایهسینی ائشیتدیرمک مجبوریتیندهییک." دئیهرک هیومنیترین فیلم فستیوالینی، دونیانین ویجدانی سسی اولان تورکیهده گئرچکلشدیرمکدن و اینسانی مسئلهلره متمرکز اولان شخصلری اؤلکهده آغیرلاماقدان سئوینج دویدوغونو بیلدیردی.
سوباچی، ترتنین اجتماعی مسئولیت پروژهلرینی ایجرا ائدن ترت وورلد سیتیزنین بیر گیریشیمی اولان فستیوالا بو ایل، تورکیه، ایسپانیا، آمریکا، فرانسا، هیندیستان، نیجریه، قیرقیزیستان، پاکیستان، ماجاریستان و فیلیسطین کیمی بیر چوخ فرقلی اؤلکهدن ۳۷۰دن چوخ فیلمین باش ووردوغونو ایضاح ائتدی.
دانیشماسیندا غزهدهکی اینسانی درام و ایسرائیل دهشتینه ده توخونان ترت باش مودورو،
"ایسرائیل ۷ اکتبردان بری غزه خالقینا قارشی توپلو بیر قیرغین گئرچکلشدیریر. کؤرپه، اوشاق، قادین، خسته تانیمادان؛ خستهخانالاری، قوتسال مکانلاری، اوخوللاری، سیغینماچی دوشرگهلرینی یئرله بیر ائدرک اینسانلیق سوچو ایشلهییر" دئدی.