اردوغان: وطن عشقی ایستیقلال مارشینا یانسیمیشدیر

جمهورباشقانی رجب طیب اردوغان، " ایستیقلال مارشیمیزی اونوتدوغوموز گون، آیاغیمیزا اسارت قاندالی وورولموش دئمکدیر" دئدی.

جمهورباشقانی اردوغان، ۱۲ مارس ایستیقلال مارشینین قبولو و مارشین شاعری محمد عاکیف ارسویو خاطیرلاما گونو سببی ایله بیر مئساژ یاییملادی.

ایستیقلال مارشینین، میللت اولاراق حریت قازانماق، وطنی ایشغالدان قورتارماق و یئنی بیر گله‌جک قورماق اوچون بیر عصردن داها اوزون مدت اؤنجه میللی بیرلیگین ایفاده‌سی اولدوغونو ایفاده ائد‌ن اردوغان،

"مدنیت تجروبه‌میز، دگرلریمیز، اینانجیمیز، میللتیمیزین تاریخده‌کی یوروشو ایستیقلال مارشیمیزین میصراعلاریندا وجود تاپمیشدیر. ایستیقلال حربینی یئریدن تورکیه بؤیوک میللت مجلیسینین ایراده‌سی، قرارلیلیغی؛ عسگریمیزین جبهه‌ده‌کی فداکارلیغی، عزمی، وطن عشقی ایستیقلال مارشینا عکس اولونموشدور" ایفاده‌لرینه یئر وئردی.

بو گون ده ایستیقلال مارشینداکی هر لفظی، هر مئساژی بد‌نینین و روحونون هر ذره‌سی ایله اؤزومسه‌ین گنجلرین اولدوغونو وورغولایان جمهورباشقانی اردوغان، بونلاری قید ائتدی:

"بایراق و اذان حساسیتینی یئری گلدیگینده جانی باهاسینا قورویان اؤولادلاریمیز واردیر. تورک میللتینین مینلرجه ایللیک دؤولت و مدنیت دعویسینی اون بندده اورکلره نقش ائد‌ن ایستیقلال مارشیمیزی اونوتدوغوموز گون، آیاغیمیزا اسارت قاندالی، بویوموزا ذلت زنجیری وورولموش دئمکدیر. میللتیمیزین کؤنولونده مستثنی بیر یئره صاحب اولان بؤیوک وطن شاعریمیز محمد عاکیف ارسوی، باشدا ایستیقلال مارشیمیز اولماق اوزره اثرلری ایله و فیکیرلری ایله هر زامان سایغی ایله یاد ائدیله‌جک. ایستیقلال مارشیمیزین قبولونون ایل دؤنومونده، محمد عاکیف ارسوی باشدا اولماق اوزره، ایستیقلال موباریزه‌میزین بوتون قهر‌مانلارینی رحمت و مینتله آنیر؛ بوتون وطنداشلار‌می ان قلبی دویغولاریملا سالاملاییرام".