تۆرک دؤولتلری تشکیلاتی، تیکا ایله آنلاشما ایمضالادی
آنلاشما متنینین آماجینین، امکداشلیغی گوجلهندیرمک، بؤلگهسل قالخینما اورتاقلیقلارینی گلیشدیرمک و عضو دؤولتلرین قارشیلاشدیغی چتینلیکلره بیرلیکده اورتاق حل یوللاری گلیشدیرمک اولدوغو ایفاده ائدیلدی
تۆرک دؤولتلری تشکیلاتی کاتیبلیگی ایله تۆرک امکداشلیق و کوردیناسیون آژانسی باشقانلیغی (تیکا) آراسیندا "امکداشلیق آنلاشما متنی" ایمضالاندی.
تۆرک دؤولتلری تشکیلاتینین ایستانبولداکی کاتیبلیک بیناسیندا ائدیلهن مراسیمده، ایکی تشکیلات آراسیندا واریلان امکداشلیغا باغلی ایمضالار، تۆرک دؤولتلری تشکیلاتی باش کاتیبی ائلچی کوبانیچبک عؤمورعلییئو و تیکا باشقانی سرکان قایالار طرفیندن آتیلدی.
مراسیمده دانیشان عؤمورعلییئو، متنین، امکداشلیغی تشویق ائتمهیی، بیلگی پایلاشماسینی و تجروبه آلیش وئریشینی آماجلایان استراتژیک بیر اورتاقلیغین باشلانغیجینا ایشاره ائتدیگینی سؤیلهدی.
آنلاشما متنینین آماجینین، امکداشلیغی گوجلهندیرمک، بؤلگهسل قالخینما اورتاقلیقلارینی گلیشدیرمک و عضو دؤولتلرین قارشیلاشدیغی چتینلیکلره بیرلیکده اورتاق حل یوللاری گلیشدیرمک اولدوغونو ایفاده ائدن عؤمورعلییئو،
"بو امکداشلیق سایهسینده، داوام ائتدیریلهبیلیر قالخینما هدفلری ده داخیل اولماق اوزره اولوسلارآراسی سویهده قبول گؤرموش قالخینما هدفلرینه قاتقی وئرمهیی و بؤلگهنین اجتماعی-اقتصادی منظرهسی اوزرینده مثبت تأثیر یاراداجاق سینرژیلر میدانا گتیرمهیی هدفلهییریک" دئدی.
عؤمورعلییئو، آنلاشما متنینین ساغلیقدان تحصیله، تیجارتدن چئورهیه قدر چوخ ساییدا امکداشلیق ساحهسینده قالخینمانین موختلیف ایستیقامتلرینی اله آلما قرارلیلیغینی عکس ائتدیردیگینی، گئنیش چرچیوهلی اولدوغونو و امکداشلیق روحونو ملموسلاشدیردیغینی ایفاده ائتدی.
قایالار دا، تۆرک دؤولتلری تشکیلاتینین تۆرک دونیاسی اوچون اولدوقجا بؤیوک اؤنمه صاحب اولدوغونو دیله گتیرهرک بونلاری دئدی:
"بیزیم ده تیکا اولاراق، بوتون اؤلکهلرده، ایستر عضو اؤلکهلرده ایستر گؤزلمچی اؤلکهلرده اوفیسیمیز وار. اوفیسلریمیز یولویلا ساحهدهییک و عینی زاماندا بو گون بو امکداشلیق آنلاشما متنی ایله ده تۆرک دؤولتلری تشکیلاتی عضوو اؤلکهلرده قالخینما امکداشلیغینا دایر، قالخینمانین بوتون ساحهلرینه دایر ائدیلهبیلهجک اورتاق پروژهلر اوزرینه اؤنملی بیر آددیمی آتدیق".
قایالار، امکداشلیغین درینلشدیریلمهسی و چئشیدلندیریلمهسی اوچون چابالارینین داوام ائدجگینی سؤیلهدی.