آذربایجان، ارمنیستانا قارشی "قارشیلیق عملیاتی" تشکیل ائتدی
آذربایجان دؤولت سرحد خیدمتیندن وئریلهن آچیقلامادا، آذربایجان عسگرلرینه آتیش ائدیلن مؤوضعین تامامییله یوخ ائدیلدیگی، ارمنیستان عسگرلری آراسیندا ایتکیلر اولدوغو بیلدیریلدی
آذربایجان، ارمنیستاندان ائدیلن آتیش نتیجهسینده سرحدده کئشیک توتان بیر عسگرینین یارالانماسی اوۆزرینه "قارشیلیق عملیاتی" تشکیل ائتدی.
آذربایجان دؤولت سرحد خیدمتیندن وئریلهن آچیقلامادا، سرحد گؤزتچیلرینین ارمنیستانین دۆننکی تخریباتینا جاواب اولاراق عملیات تشکیل ائتدیگی بیلدیریلدی.
آچیقلامادا، آذربایجان عسگرلرینه آتیش ائدیلن مؤوضعین تامامییله یوخ ائدیلدیگی، ارمنیستان عسگرلری آراسیندا ایتکیلر اولدوغو بیلدیریلدی.
ارمنیستان طرفیندن ائدیلهجک تخریباتلارا بوندان سونرا داها جدی و قرارلی تدبیرلرله جاواب وئریلهجگی وورغولانان آچیقلامادا، حادثهنین مسئولیتینین ارمنیستانین عسگری و سیاسی رهبرلیگینده اولدوغو قید ائدیلدی.
ارمنیستان ساوونما باخانلیغیندان وئریلهن آچیقلامادا ایسه آذربایجانین قارشیلیق عملیاتیندا ایلک بیلگیلره گؤره ۲ عسگرین حیاتینی ایتیردیگی ایفاده ائدیلدی.
دۆنن، زنگیلان ائلینین کوللوقیشلاق کندی ایستیقامتیندهکی آذربایجان مؤوضعلرینه، کافان ائلینین نرکین-آند کندی ایستیقامتیندهکی ارمنیستان مؤوضعلریندن آتیش ائدیلمیش و بیر آذربایجان عسگری یارالانمیشدی.