الهام علی‌یئو 11-جی گلوبال باکی فورومونون آچیلیشیندا چیخیش ائدیب

آزربایجان پرزیدنتی الهام علی‌یئو اؤلکه تورپاقلارینی ایشغالدان خیلاص ائتمکله تاریخی عدالته نایل اولدوقلارینی بیان ائدیب، "بیز ارمنیستانلا صلحه همیشه‌کیندن داها یاخینیق. گونئی قافقاز هئچ واخت صلحه بو قدر یاخین اولماییب". دئدی.

الهام علی‌یئو پایتاخت باکیدا کئچیریلن 11-جی گلوبال باکی فورومونون آچیلیشیندا چیخیش ائدیب.

آزربایجان پرزیدنتی چیخیشیندا 2-جی قاراباغ ساواشینا قدر (27 سپتامبر- 10 نوانبر 2020-جی ایل) گئدن پروسه‌لره، آزربایجان تورپاقلارینین ایللردیر ارمنیستانین ایشغالی آلتیندا قالماسینا، ایللرله داوام ائدن دانیشیقلار پروسه‌سینین اوغورسوزلوغا دوچار اولماسینا گئنیش یئر آییریب.

آزربایجانین 2-جی قاراباغ ساواشی و سپتامبردا کئچیریلن آنتی ترور عملییاتی ایله بوتون تورپاقلاریندا ائگمنلیگینی ساغلایان علی‌یئو، "بو گون بیز ارمنیستانلا اوولکیندن داها چوخ صلحه یاخینیق. گونئی قافقاز هئچ واخت صلحه بو قدر یاخین اولماییب. بو، 2-جی قاراباغ ساواشی سایه‌سینده باش وئریب" دئدی.

علی‌یئو ارمنیستانین ایللردیر سیلاحلاندیغینی وورغولاییب، "آنتی ترور عملییاتی زامانی تخمینن 1 میلیارد دولار دیرینده حربی ماشین، سیلاح و مهمات اله کئچیردیک. 2-جی قاراباغ ساواشیندا اله کئچیردیگیمیز دؤیوش غنیمتلرینین دیری 5 میلیارد دولار ایدی. بو سیلاحلارین هامیسی ارمنیستانا تمناسیز اولاراق وئریلمیشدی." دئدی.

آزربایجانین صولح پروسه‌سینی داوام ائتدیرمیه حاضیر اولدوغونو وورغولایان علی‌یئو، قئید ائدیب کی، "بیز تاریخی عدالته نایل اولدوق. ایندی بؤلگه‌دکی دوشمنچیلییه سون قویماغین واختیدیر."

الهام علی‌یئو فرانسه‌نین آنتی-آزربایجان موناسیبتینه ده توخوناراق، "فرانسه‌ آزربایجانا تحریم تطبیق ائتمک اوچون چوخ چالیشدی. بیز اولوسلارآراسی حقوقا قارشی هئچ نه ائتممیشیک و فرانسه‌نین بوتون جهدلری بوشا چیخدی." دئدی.