بلینکن، جمهورباشقانی علییئوی تبریک ائتدی

آمریکا بیرلشمیش دؤولتلری خاریجی ایشلر باخانی آنتونی بلینکن، آذربایجان و ارمنیستان آراسیندا واریلان آنلاشمانی دستکله‌دیکلرینی ایفاده ائتدی.

آذربایجان جمهورباشقانی ایلهام علییئو ایله آمریکا خاریجی ایشلر باخانی آنتونی بلینکن تلفندا دانیشدی.

آذربایجان جمهورباشقانلیغی طرفیندن وئریله‌ن آچیقلامادا، بلینکنین جمهورباشقانی علییئوه، ارمنیستان-آذربایجان آراسینداکی سرحدلرین تعیین اولونماسی قونوسوندا واریلان آنلاشمادان اؤترو تبریکلرینی چاتدیردیغی و بونون آمریکا طرفیندن دستکلندیگینی وورغولادیغی بیلدیریلدی.

علییئو، ایکی اؤلکه‌نین سرحدلندیرمه کمیسیونونون واردیغی آنلاشمانین دیالوگ و قارشیلیقلی آنلاییش ایچریسینده ائدیله‌ن گؤروشمه‌لرین نتیجه‌سی اولدوغونو قید ائتدی. سرحد تعیین ائتمه ایشلرینه باشلانماسینین مثبت بیر آددیم اولدوغونو ایفاده ائد‌ن علییئو، آذربایجانین باریشی داوام ائتدیرمه قونوسونداکی عزمینی ده وورغولادی.

تلفن دانیشماسیندا، آیریجا ایکیلی ایلیشکیلری گوجله‌ندیرمه، اینسان حاقلاری، انرژی، ایقلیم و (۲۰۲۴ بیرلشمیش میللتلر ایقلیم دییشیکلیگی کنفرانسی) کوپ۲۹ ساحه‌لرینده‌کی امکداش‌لیق قونولاری اله آلیندی.