آتاتورکو آنما، گنجلیک و ایدمان بایرامینیز قوتلو اولسون!
«ایزمیرین یونان عسگرلری طرفین‌دن ایشغالی میللتی و اوردونو چوخ کدرلندیردی. نه خالق، نه ده اوردو بو حاق‌سیز سالدیرینی قبول ائتمه‌یه‌جک"
بو گون تورکیه‌ده آتاتورکو آنما، گنجلیک و ایدمان بایرامیدیر. بایرامین قوتلانماسی اؤلکه‌ده ۱۹۱۹-جو ایل میین ۱۹دا میللی ایستیقلال ساواشینین باشلادیغی تاریخله باغلیدیر.
۱۹ می تورکیه جمهوریتینین قوروجوسو مصطفی کمال آتاتورکون سامسونا گلیشی و قورتولوش موباریزه‌سینین باشلادیغی گون کیمی قوتلانیر. عینی زامان‌دا، بو گون گنجلیک و ایدمان بایرامیدیر. بو موناسیبتله هر ایل رسمی تدبیرلر، ائلجه ده گنجلر و ایدمانین اینکیشافینا دایر یاریشلار، گؤستریلر، سمینار و کنفرانسلار گئچیریلیر.
بیرینجی دونیا ساواشی باشا چاتدیق‌دان سونرا عثمانلی دؤولتینین بیر سیرا اراضی‌سی متفیق دؤولتلر طرفین‌دن ایشغال ائدیلدی. ۱۹۱۹.جو ایل ۱۶ می تاریخین‌ده ۳۶.جی عثمانلی سلطانی ۴.جو محمد وحیدالدین طرفین‌دن مصطفی کمال پاشا ۹.جو اوردو مفتیشی اولاراق ایستانبول‌دان «باندیرما» گمی‌سی ایله آنادولویا گؤندریلدی، آیین ۱۹وندا سامسونا چاتدی. آنادولونون مرکزین‌ده میللی موجادیله‌یه باشلاماغی پلانلاشدیران آتاتورک بیر گون سونرا عثمانلینین باش وزیری داماد فرید پاشایا گؤندردیگی تلگرام‌دا «ایزمیرین یونان عسگرلری طرفین‌دن ایشغالی میللتی و اوردونو چوخ کدرلندیردی. نه خالق، نه ده اوردو بو حاق‌سیز سالدیرینی قبول ائتمه‌یه‌جک" سؤزلریله هدفینی قاپالی شکیل‌ده اورتایا قویور.
محض بو موباریزه ایله تورکیه خاریجی قوه‌لردن قورتاریلدی و ۱۹۲۳.جو ایل ۲۹ اکتبر گونو تورکیه جمهوریتی اعلان اولوندو.
مصطفی کمال آتاتورکون سامسونا چاتما تاریخی اولان ۱۹ می اونون اؤز ایستگی ایله هر ایل گنجلیک و ایدمان بایرامی کیمی قوتلانیر. بایراما «آتاتورکو آنما» علاوه‌سی ایسه ۱۹۸۱.جی ایلده اولوندو و همین واخت‌دان بو گونه‌دک هر ایل رسمی اولاراق ۱۹ می آتاتورکو آنما، گنجلیک و ایدمان بایرامی کیمی گئچیریلیر.
۱۹ می هم ده تورکیه جمهوریتینین قوروجوسو مصطفی کمال آتاتورکون سمبولیک اولاراق دوغوم گونو کیمی قوتلانیر. آتاتورک، ۱۸۸۱.جی ایلین می آیین‌دا باتی تراکیا ویلایتینین سئلانیک شهرین‌ده دونیایا گلدی.
