Russiýa Litwa protest notasyny berdi

Russiýanyň Daşary işler ministrliginden berilen ýazmaça beýanatda, Litwanyň Kaliningrad sebitine demir ýoly arkaly önümleriň daşalmagyna çäklendirme girizmek barada karar kabul edendigi ýatladyldy. 

Beýanatda şol kararyň Russiýa bilen Ýewropa Bileleşiginiň arasynda Kaliningrad sebitine önümleriň daşalmagy bilen baglanşykly 2002-nji ýylda baglaşylan ylalaşyga ters gelýändigi we duşmançylyklydygy beýan edildi. 

Şol sebäpli Litwanyň Moskwa şäherindäki ilçihanasynda işleýän ilçiniň wekili Wirjiniýa Umbraseniň ministrlige çagyrylandygy bellenen beýanatda: "Wekile Litwanyň topraklaryndan Kaliningrad sebitine tapawutly önümleriň demir ýoly arkaly geçirilmegine rus tarapyna habar berilmeden girizilen çäklendirme sebäpli protest notasy berildi. Wekilden şol çäklendirmeleriň tiz wagtda aýrylmagy islendi. Eger Kaliningrad bilen Russiýanyň galan böleginiň arasynda ýük daşamak hyzmaty ýaňadandan ýola goýulmasa Russiýa milli bähbitlerini goramak hukugyny özünde saklaýar" diýip beýan edildi. 

Russiýanyň hökümediniň metbugat sekretary Dmitriý Peskow hem Litwanyň Kaliningrad bilen baglanşykly kararynyň ozalky kararlara meňzemeýändigini belläp: "Bu ähli zadyň düzgün bozmasydyr. Onuň ÝB-niň girizen sanksiýalarynyň, önümleriň geçirilmegini hem öz düzüminde jemleýändigine düşünýäris" diýdi

Peskow ýagdaýyň tankydydygyny belläp: "Şol sebäpli islendik çäre ýa-da karar kabul edilmeden ozal, gutarnykly analiz edilmeli. Şol analiz öňümizdäki birnäçe günüň içinde amala aşyrylar" diýip nygtady.