Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler.
“Sabah” gazeti “Ministr Fidan Palestinanyň Premýer-ministri bilen telefon arkaly söhbetdeş boldy” söz başyly habarynda, Daşary işler ministri Hakan Fidanyň Palestinanyň Premýer-ministri we Daşary işler ministri Muhammed Mustafa bilen telefon arkaly söhbetdeş bolandygyny, telefon söhbetdeşliginde Gazadaky we Günbatar Şeriadaky soňky ýagdaýlar hakynda pikir alyşylandygyny ýazýar.
“Hürriýet” gazeti “Ministr Uralogly: Arkalaşygymyzy dowam etdireris” söz başyly habarynda, Ulaglar we infrastruktura ministri Abdulkadir Uraloglynyň Birleşen Arap Emirlikleriniň Maýa goýumlar ministri Mohammed Bin Hassan Al Suwaidi bilen Stambulda geçiren duşuşygy hakynda “Geljekki tapgyrda Birleşen Arap Emirliklerinden, Yrakdan we Katardan kärdeşlerim bilen bilelikde dörttaraplaýyn ministrler derejesinde duşuşyk geçireris. Galkynyş ýoly taslamasynda arkalaşygymyz dowam eder” diýen sözlerini okyjy köpçüliginiň dykgatyna ýetirýär.
“Star” gazeti “Meksikaly ministri Margues: Türkiýäniň üstünligi serhetleri aşyp, ýurdumyza geldi” söz başyly habarynda, türk seriallarynyň meksikalylaryň Türkiýä saparynda möhüm täsiriniň bardygyny beýan eden Meksikanyň Syýahatçylyk ministri Miguel Torukko Marguesiň “Türk liderler iňňän üstünlikli seriallar we kino-filmler bilen geçiren tanyşdyryşlary arkaly uly üstünlik gazandylar, serhetleri aşyp, Meksika ýetdi. Türkiýäniň güler ýüzlüligini we dostlugyny görkezdi” diýen sözlerini çap edýär.
“Watan” gazeti “Ministr Baýraktar beýan etdi: LNG ylalaşygy üçin amerikan firmasy bilen gepleşik geçirildi” söz başyly habarynda, Energetika we tebigy serişdeler ministri Alparslan Baýraktaryň LNG, ýagny sunklandyrylan gaz ylalaşygy üçin ABŞ-nyň energetika firmasy “Exxon Mobil” bilen gepleşik geçirilendigini aýdandygyny ýazýar.
“Haber Türk” gazeti “Milli boksçy Samet Gümüş Ýewropanyň çempiony” söz başyly habarynda, Serbiýada geçirilen Ýerwropanyň Boks çempionadynda erkekleriň arasynda 51 kilogramda Samet Gümüşiň finalda Wengriýadan Atila Bernardy ýeňip, altyn medal alandygyny okyjy köpçüliginiň dykgatyna ýetirýär.
