TÜRKSOÝ-yň 30 ýyllygy Aşgabatda bellenilip geçildi
Halkara Türk medeniýeti guramasy TÜRKSOÝ-yň döredilmeginiň 30 ýyllygy mynasybetli Türkmenistanyň paýtagty Aşgabat şäherinde Türki Döwletleriň Medeniýet hepdeliginiň açylyş dabarasy geçirildi
Dabarada Türki dilli döwletlerden gelen sungat işgärler tarapyndan ýerine ýetirilen aýdym-sazlara uly şowhun bilen tomaşa edildi.
TÜRKSOÝ-yň 30 ýyllygy Türkmenistanyň paýtagty Aşgabat şäherinde uly dabara bilen bellenilip geçildi. Türki dilli Döwletleriň Medeniýet hepdeliginiň açylyş dabarasy Aşgabat şäherindäki Magtymguly adyndaky milli sazly drama teatrynda amala aşyryldy. Dabara Ministrler kabinetiniň başlygynyň orunbasary Mährijemal Mämmedowa, TÜRKSOÝ-yň Baş sekretary Sultan Raýew, Türkiyäniň Aşgabat şäherindäki Adatdan daşary we doly ygtyýarly ilçisi Togan Oral bilen medeni we sungat dünýäsiniň resmileri gatnaşdylar. Dabarada çykyş eden TÜRKSOÝ-yň Baş sekretary Sultan Raýew 2024-nji ýylyň TÜRKSOÝ tarapyndan Magtymguly ýyly hökmünde yglan edilendigini ýatlatdy. Türk dünýäsiniň beýik şahyry we akyldary Magtymguly Pyragynyň doglan gününiň 300 ýyllygynyň bütin Türk dünýäsinde giňden bellenilip geçiljekdigini habar berdi.
TÜRKSOÝ-yň Baş sekretary Sultan Raýew: “TÜRKSOÝ-yň döredilmeginiň 30 ýyllygyny ilki bilen Almata, Bişkek we Daşkent şäherlerinde geçirdik. Şu gün bolsa Aşgabatda amala aşyrarys. Ondan soň bolsa öňümizdäki ýyl Baku, Stambul we Ankara şäherlerinde belläp geçeris. Bu biziň medeniýetimiziň taryhy günleri. Bu 30 ýyl biz üçin örän möhüm ýyllar boldy. TÜRKSOÝ-yň maksady Türk dünýäsindäki Medeni sazlaşyk ýagdaýyny işjeňleşdirmek, güýçlendirmek, medeniýetimiz bilen biziň ellerimiziň dostlugyny berkitmek” diýip belledi.
Dabarada Gazagystan, Azerbaýjan, Gyrgyzystan, Özbegistan we Türkiye döwletlerinden gelen sungat işgärleriniň çykyşlaryna uly şowhun bilen tomaşa edildi. Esasan hem Azerbaýjan tansy, Manas dessany we Küştdepdi tansy tomaşaçylarda uly şowhun döretdi.
Türkiyäniň Aşgabat şäherindäki Adatdan daşary we doly ygtyýarly ilçisi Togan Oral: “Siziň hem bilişiňiz ýaly TÜRKSOÝ Türk dünýäsi üçin möhüm bir gurama. Bizi biri-birimiz bilen jebisleşdirýän medeni-taryhy gatnaşyklary şu günki güne çenli ýetiren we geljek nesillere ýetirjek işleri amala aşyrýan işjeň we möhüm bir gurama. TÜRKSOÝ-yň 30 ýyllygyny Ata Watanymz Türkmenistanda we bular ýaly ajaýyp derejede belläp geçmegimiz we Türk medeni günlerini bular ýaly görnüşde başlatmagymyz bizi buýsandyrdy we bagtyýar etdi” diýip belledi.
Dabaralar hepdäniň dowamynda sebitiň medeni ýerlerinde dowam eder. Umumy taryhy we medeni mirasy suratlandyrýan sergiler we konferensiýalar geçiriler.
