اوُوغانیستان تۆرکمنیستان بیلن قاتناشیقلارینی یوُقارلاتماق ایسله‌یأر
امیرخان متقی و بیله‌لیگیندأکی توُپار تۆرکمنیستانا ایکی گۆنلۆک ساپار قوردی
اوُوغانیستان ینگ داشاری ایشلر وزیرلیگی نینگ وظیپه سینی واغتلایین (موقت) یرینه یتیریجیسی امیرخان متقی نینگ یوُلباشچیلیغینداقی اوُوغان توُپار تۆرکمنیستان دا ایکی گۆنلۆک ساپاردا بوُلدی.
تۆرکمنیستان ینگ داشاری ایشلر وزیری رشید مردوف بیلن امیرخان متقی نینگ یوُلباشچیلیغینداقی دۆلی دؤولت دۆزۆملری نینگ آراسیندا دوشوشیق گچیریلدی.
اوُوغانیستان ینگ الکتریک ادااسی برشنا و اوُوغانیستان ینگ دمیریوُل مۆدیرلیگی نینگ جوُغاپکأرلری بو دوشوشیغا قاتناشدی.
گپله‌شیکلرده ایکی تاراپلایین قاتناشیقلارینگ اؤسدۆریلمه گی بیلن باغلانشیقلی کؤپ سانلی مسئله حاقیندا گنگه‌شیلدی.
تۆرکمنیستان و اوُوغانیستان ینگ قاتناشماغیندا ایری گؤورۆملی انرژی، اولاغ- آراقاتناشیق اولغاملارینا دِگیشلی حالقارا تاسلامالارینگ ایش یۆزۆنده دورموشا گچیریلمه گی بیلن باغلانشیقلی ادیلیأن ایشلر سلجریلدی.
ایکی تاراپ، تۆرکمنیستان- اوُوغانیستان- پأکیستان- هیندیستان طبیغی گاز گچیریجی توبانینگ، تۆرکمنیستان- اوُوغانیستان- پأکیستان یوُقاری ولت‌لی الکتریک گچیریجی اولغامی نینگ و ایکی یوردی بیرله‌شدیریأن دمیریوُللارینگ قورلوشیغی نینگ تاسلامالاری نینگ موندان بیلأک ده اؤسدۆریلمه گی بوُیونچا گِنگِه‌شدیلر.
امیرخان متقی آشغابادا ساپاری نینگ ایکینجی گۆنۆنده تۆرکمنیستان ینگ وزیرلر کابینه سی نینگ یانینداقی اولاغ و قاتناشیق آژانسی نینگ باشلیغی مأممِت حان چاقی‌یف بیلن دوشوشیق گچیردی.
اوُوغان تاراپ تۆرکمن باشی حالقارا دنگیز اسکله سی نینگ اۆستی بیلن یۆکلری نینگ أکیدیلمه‌گی اۆچین اوُوغان ایشه‌وۆرلرینه حاص کؤپ مۆمکینچیلیک دؤره‌دیلمه‌گینی ایسله دی.
امیرخان متقی "لاجورد یوُلی" آدی بیلن بیلینیأن و اوُوغانیستان دان تۆرکمنیستانا، شوُل یردن ده حازار دنگیزینی آشیپ آذربایجان و اوروپا یتیأن کریدورینگ ایشجنگ‌له‌شمه‌گینی ایسله دی.
چاقی یف یاقین واغتدا اوُوغانیستان ینگ سؤودا و صِناغات (تیجارت و صنایع) وزیری نینگ یوُلباشچیلیغینداقی اوُوغان ایشه‌وۆرلر توُپاری نینگ تۆرکمنیستانا گلجکدیگینی و شوُلارینگ تۆرکمن باشی شهری نینگ حالقارا دنگیز اسکله سی نینگ مۆمکینچیلیکلری بیلن تانیشجاقدیغینی بیلدیردی.
دِگیشلی حابارلار
اؤزبگیستان دا دیری تاریح فیلملری چکیلر
میرضیایف "دیری تاریح" آدلی فیلملرینگ چکیلمه گی حاقیندا ماغلومات آلدی.
