ایسرائیل رفح شهرینی قورودان اشغال ائتمه‌یه حاضیر

ایسرائیل اوردوسونون تئزلیکله غزه زولاغینین گونئیینده‌کی رفح شهرینی قورودان اشغال ائتمه‌یه حاضیرلاشدیغی بیلدیریلیب.
ایسرائیلین رسمی تلویزیون کانالی کان-ین آدی آچیقلانمایان حربی منبعلره ایستینادن وئردیگی معلوماتا گؤره، ایسرائیل اوردوسو چوخلو سایدا فیلیسطینلینی چوخ تئزلیکله تخلیه ائتمک اوچون رفح‌ده قورودان ایشغال عملیاتینا حاضیرلاشیر.
کانالین حربی خبر شرح‌چیسی ایتای بلومنتال "ایسرائیل اوردوسونون پلانینا اساساً، رفح‌ده‌کی 1 میلیوندان چوخ فیلیسطینلیدن بؤلگه‌نی بوشالتمالاری و غزه زولاغینین جنوب و مرکزی حیصه‌سینده یئنی حاضیرلانمیش سیغیناجاقلارا کؤچملری ایستنیله‌جک." دئدی.
بلومنتال قید ائدیب کی، غزه‌نین گونئی و مرکزی حیصه‌سینده اولوسلارآراسی یاردیم تشکیلاتلاری و دیگر دؤولتلر طرفیندن رفحی ترک ائدن مجبوری کؤچکون فیلیسطین‌لیلر اوچون مینلرله چادیر حاضیرلانیب.
پلانین آمریکا و آدینی چکمدیگی بؤلگه اؤلکه‌لرینه تقدیم ائدیلدیگینی بیلدیرن بلومنتال، ایسرائیل اوردوسونون رفح‌ده ایرلیلییشینین مرحله‌لی اولاجاغینی بیلدیریب.
بلومنتال ایسرائیل اوردوسونون رفحه قارشی قورو عملیاتی باشلامازدان اول تخلیه ائدیله‌جک فیلیسطین‌لیلره بو باره‌ده معلومات وئریلجیینی وورغولاییب.
بلومنتالین سؤزلرینه گؤره، رفح شهرینین بوشالدیلماسی 4-5 هفته‌ چکجک.
"اسرائیل هیوم" قزئتی رفحه قورودان ایشغال قرارینین غزه‌ده‌کی حماس لیدئری یحیی سنوارین بیر نئچه گون اول واسیطه‌چیلر یولو ا‌یله ائدیلن تکلیفه منفی جاواب وئرمه‌سی نتیجه‌سینده آلیندیغینی یازیب.
1.5 میلیون فیلیسطین‌لینین سیغیندیغی رفحی هدف آلان ایسرائیل، اینسانی فلاکت خبردارلیغینا باخمایاراق، بؤلگه‌نی "حماسین سون قالاسی" آدینی وئررک ایشغال ائتمکده ایسرارلیدیر.