2023-جو ایلده روسیا-اوکراینا محاربهسینین مومکون گئدیشاتی
ستا – سیاست، اقتصادیات و جمعیت آراشدیرمالاری فوندونون آراشدیرماچیسی جان آجونون "2023-جو ایلده روسیا-اوکراینا محاربهسینین مومکون گئدیشاتی" باشلیقلی یازیسی.
2022-جی ایل باخیمیندان اولوسلار آراسی ژئوسیاسی تنلیکده ان حل ائدیجی حادثه روسیانین اوکراینانی ایشغال ائتمک جهدی اولدو. بیر چوخ متخصص لر روسیانین آسانلیقلا اؤلکهنی اله کئچیرجگینی دوشونسهلر ده، روسیا اوکراینایا قارشی اوغور قازانا بیلمهدی. محاربه هر ایکی طرف اوچون داغیدیجی شکیلده داوام ائدیر. 2023-جو ایل باخیمیندان اولوسلار آراسی سویهده ان مهم مسئلهنین داوام ائدن محاربه اولاجاغی گؤرونور و طرفلرین هلهلیک سیاسی اوزلاشمادان اوزاق اولدوغو آیدیندیر.
یئنی ایلین ایلک گونلرینده روسیا-اوکراینا محاربهسی تام سرعتله داوام ائدیر. خصوصیله اوکراینا اوردوسونون دونسک-ین ماکیفکا قصبهسینده روسیا عسگرلرینی هدفه آلماسی بؤیوک عکس-صدا دوغوردو. اوکراینا منبعلری هیمارس ایله هوجوم نتیجهسینده ان آز 400 روسیا عسگرینین اؤلدوگونو آچیقلاسا دا، روسیا ساوونما ناظیرلیگی ایندییه قدر 83 عسگرین حیاتینی ایتیردیگینی اعتراف ائتمهلی اولدو.
روسیا سون آیلاردا محاربهنین ایلک زامانلاریندا اورتایا قویدوقلاری داغینیقلیق گؤرکمیندن خلاص اولاراق داها متشکیل شکیلده دؤیوشمهیه باشلاییب، خصوصیله بیرلشمیش حربی قوهلر قوموتانلیغینداکی دییشیکلیکله روسیا حربی هاوا قوهلرینین قوموتانی سرگئی سوروویکیننین اوکراینادا دؤیوشن قوشونلارین یئنی قوموتانی تعیین ائدیلمهسیندن سونرا نیسبتن مثبت منظره یارانیب. لاکین ماکیفیکاداکی آغیر مغلوبیت یئنه سوال ایشارهلری دوغوروب. بؤلگهدهکی مسکونلاشمانین هیمارس-ین احاته دایرهسینده اولدوغو و موبیل تلفون سیخلیغی سببیندن کامپوسداکی عسگرلرین هدفه آلیندیغی دوشونولور. دئمهلی، بورادا یئنه قوموتا-نظارت و انتظامسیزلیگین سبب اولدوغو ایتکی وار.
لاکین سون آیلاردا سوروویکیننین رهبرلیگی آلتیندا روسیا اوردوسو معین ایتکیلرله راضیلاشاراق ساوونما خطی یاراتماغی باجارمیش و آغیر ایتکیلرینی مینیموما ائندیرهرک قیشین یاراتدیغی هاوا شرایطیندن ایستیفاده ائدهرک موضع لرینی محکملندیرمهیه نایل اولموشدور. همچنین گؤرونوردو کی، سوریه-دهکی کیمی محو ائتمه ایستراتژیسی ایله اوکراینا آلت یاپیسینی هدف آلان سوروویکینین هوجوملاری نتیجه وئردی و اوکراینا اوردوسونون سرعتینی قیردی. آنجاق بئله گؤرونور کی، روسیا اوردوسوندا سوروویکینین حل ائده بیلمهیهجگی داها أساس پروبلئملری وار.
یاز آیلاری ایله جبهه خطینده داها شدتلی توققوشمالارین باش وئرجگی، خصوصاً ده اوکراینا اوردوسونون ایشغال اولونموش اراضیلری خلاص ائتمک اوچون قورو عملیاتلاری تشکیل ائدجگی گؤزلنیلیر. یئنه باتی اؤلکهلری سلاح یاردیملارینی داوام ائتدیررکن، روسیا ایسه ساوونما صنایع سینه داها چوخ اهمیت وئرهرک اوره تیم لرینی آرتیرماغا جهد ائدیر. یئنه ده اونوتماق اولماز کی، جمعیت باخیمدان اوستون طرف روسیادیر. محاربهنین اوزاندیغی تنلیکده طرفلر کورلاما محاربهسی منطقی ایله حرکت ائدرکن، کیمین داها چوخ مقاومت گؤستریب ساغ قالاجاغی سوال ایشارهلری دوغورور. هر ایکی طرفین مثبت و منفی طرفلری وار، طبیعی کی، اوکراینانی دستکلهین باتی اؤلکهلرینین ده قطعیتی و عزمکارلیغی حل ائدیجی اولاجاق. یئنه ده چین-ین نه واختسا روسیانین خیرینه ایشه قاریشماسی مومکون سناریولاردان بیریدیر. تورکیه ایسه 2023-جو ایلده ده واسیطهچی رولونو داوام ائتدیرهجک.