تۆرک جمهوریتلرینین گۆندمیندهکی گلیشمهلر
موغولستانین اورتا آسیانین بئش اؤلکهسی ایله داها یاخین امکداشلیق یئریتمهسی و آدینین اونلارلا بیرلیکده چکیلمهیه باشلاماسی اؤنملیدیر
۲۲-۲۵ آوریل ۲۰۲۴ تاریخلرینده تۆرک دؤولتلری تشکیلاتی طرفیندن ژنوده تۆرک هفتهسی تشکیل ائدیلدی. اولوسلارآراسی تۆرک قورولوشلاری تۆرک هفتهسینده چئشیدلی فعالیتلر ائتدیلر.
۲۲-۲۷ آوریل ۲۰۲۴ تاریخلرینده بؤیوک بریتانیا خاریجی ایشلر باخانی دیوید کامرون اورتا آسیا اؤلکهلرینه سفر گئرچکلشدیردی. قازاقیستان، قیرقیزیستان، اؤزبکیستان، تاجیکیستان، تۆرکمنیستان و موغولستانا سفر ائدن اینگیلتره خاریجی ایشلر باخانی کامرون، سؤزو گئدن اؤلکهلرین جمهورباشقانلاری، خاریجی ایشلر باخانلاری ایله گؤروشمهلر ائتدی. گؤروشمهلرده روسیایا تطبیق اولونان تحریملر، ایکیلی اقتصادی امکداشلیغین یئنی سویهیه یوکسلدیلمهسی، اورتا آسیالی ایشچیلرین اینگیلترهیه گؤندریلمهسی، بؤلگهسل گۆونلیک کیمی مؤوضوعلار اؤنه چیخدی. سفر چرچیوهسینده قازاقیستان و اینگیلتره آراسیندا ایستراتژیک اورتاقلیق و امکداشلیق آنلاشماسی ایمضالاندی. دیوید کامرون قیرقیزیستان، تاجیکیستان و تۆرکمنیستانا سفر ائدن ایلک اینگیلتره خاریجی ایشلر باخانی اولدو.
۲۳ آوریل ۲۰۲۴ تاریخینده قیرقیزیستان پارلمانی باشقانی نورلانبک شاکیئو موغولستانا رسمی سفر گئرچکلشدیردی. نورلانبک شاکیئو اولانباتوردا موغولستان جمهورباشقانی، باشباخانی و مجلیس باشقانی ایله آیری آیری گؤروشمهلر ائتدی. سفر چرچیوهسینده قیرقیز خالقینین چینگیز خان و آردیللاری/خلفلری ایله تاریخی ایلیشکیلری قونولو کنفرانس تشکیل ائدیلدی. قیرقیزیستان پارلمانی باشقانی اولوسلارآراسی ترانس-آلتای سۆردورولهبیلیرلیک دیالوگونا قاتیلدی.
۲۳ آوریل ۲۰۲۴ تاریخینده قیرقیزیستان جمهورباشقانی سادیر جاپاروو فرانسا-اورتا آسیا دوستلوق قروپو باشقانی، سناتور هروه مورو باشقانلیغینداکی فرانسا هیئتینی قبول ائتدی. گؤروشمهده قیرقیزیستان-فرانسا، فرانسا-اورتا آسیا ایلیشکیلری قونوسوندا فیکیر آلیش وئریشی ائدیلدی.
قیرقیزیستان جمهورباشقانی سادیر جاپاروو ۲۴-۲۵ آوریل ۲۰۲۴ تاریخلرینده آذربایجانا دؤولت سفری گئرچکلشدیردی. جمهورباشقانی جاپاروو باکیدا دؤولت مراسیمی ایله قارشیلاندی. جمهورباشقانلاری باشقانلیغیندا آذربایجان-قیرقیزیستان ۲.جی دؤولتلرآراسی یوکسک شورا ییغینجاغی گئرچکلشدیریلدی. ییغینجاق سونوندا ایکی اؤلکه آراسیندا ۱۸ آنلاشما ایمضالاندی. جمهورباشقانلاری مطبوعات کنفرانسی تشکیل ائتدیلر. علییئو و جاپارووون ایشتیراکی ایله باکیدا چینگیز آیتماتووون هیکلینین آچیلیش مراسیمی ائدیلدی. ۲۵ آوریل تاریخینده جمهورباشقانلاری فضولی و آغدام شهرلرینین قالخینما پلانینی یئرینده آراشدیردیلار. جمهورباشقانلاری قیرقیزیستان طرفیندن خیدیرلی کندینده تیکیلهجک اوخولون تملینی آتدیلار.
۲۵ آوریل ۲۰۲۴ تاریخینده قازاقیستان جمهورباشقانی قاسم جومرد توکایئو چین خالق جمهوریتی ساوونما باخانی دونگ ژونو قبول ائتدی. آستانادا شانگهای امکداشلیق تشکیلاتینا عضو و موشاهیدهچی اؤلکهلرین ساوونما باخانلاری ییغینجاغی گئرچکلشدیریلدی.
***
قازاقیستان باشباخانی اولژاس بئکتئنوو ۲۵ آوریل ۲۰۲۴ تاریخینده تۆرکیهیه رسمی سفر گئرچکلشدیردی. جمهورباشقانی رجب طیب اردوغان طرفیندن قبول ائدیلهن باشباخان بئکتئنوو، جمهورباشقانی کؤمکچیسی جؤودت ییلماز ایله بیرلیکده ۱۳.جو تۆرکیه-قازاقیستان حوکومتلرآراسی اقتصادی کمیسیون ییغینجاغینا باشقانلیق ائتدی. سفر چرچیوهسینده تۆرکیه-قازاقیستان ایش فورومو ائدیلدی.
گلیشمهلردن گؤرولدوگو اوزره، گئچهن هفته تۆرک جمهوریتلرینده اؤنملی گلیشمهلر یاشاندی. دیوید کامرونون ۶ اؤلکهنی احتیوا ائدن سفری، اینگیلترهنین بوندان سونرا اورتا آسیادا داها تأثیرلی سیاست ایزلهیهجگی شکلینده اوخونابیلر.
موغولستانین اورتا آسیانین بئش اؤلکهسی ایله داها یاخین امکداشلیق یئریتمهسی و آدینین اونلارلا بیرلیکده چکیلمهیه باشلاماسی اؤنملیدیر.
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی