پکاکانین پئشمرگهیه باسقینی نه آنلاما گلیر؟
پئشمرگه - پکاکا مبارزهسینین آرتدیغی بئله بیر شرایطده تورکیهنین تروریزمله مبارزهسینه دستک دورومونون یاراندیغی گؤرونور
سیاست، اقتصاد و توپلوم آراشدیرمالاری وقفی اوزمانی جان آجونون یازیسینی تقدیم ائدیریک:
تورکیهنین عراقین قوزئیینده ترورلا مبارزهسینی آرتیردیغی بیر دؤورده پکاکا عراق کورد بؤلگهسل ادارهسی حربی قوهلری اولان پئشمرگهنی هدفه آلماغا باشلادی. سون ترور سالدیریلاریندا بیر نئچه پئشمرگهلی حیاتینی ایتیردی، بیر نئچهسی ده یارالاندی. ایندی عراق کورد بؤلگهسل ادارهسی ترور هؤرگوتو پکاکایا قارشی بؤیوک بیر غضب ایچیندهدیر.
قونویا گئچمزدن اؤنجه خاطیرلاداق کی، پئشمرگه، کورد سلاحلیسینا وئریلهن عمومی آددیر. کورد دیلینده «پئش» آرخاسیندان، «مرگ» ایسه اؤلوم دئمکدیر. سؤزون کورد دیلینده ترجمهسی "اؤلومون آرخاسیندان گئدن" آنلامینی وئریر. بونونلا پئشمرگهلرین اؤلومدن قورخمادیقلاری فیکری ایفاده اولونور.
پئشمرگه عسگرلری ایلک دفعه ۱۹۲۰.جی ایلده عراقین قوزئیینده کوردوستان دؤولتینی یاراتماق مقصدی ایله دؤیوشموشلر. سونراکی ایللرده پئشمرگهلرین فعالیتی ضعیفلهدی و زامانلا تاریخ صحیفهسیندن چیخدی. ۲۰۰۵.جی ایلده آمریکا عراقین قوزئیینده تهلوکهسیزلیگی تامین ائتمک اوچون پئشمرگهلرین فعالیتینی یئنیدن برپا ائتدی. سایلاری تخمیناً ۳۰۰ مین نفردیر.
سون زامانلار عراقین قوزئیینده یئرلشهن عراق کورد بؤلگهسل ایدارهسینین حربی قوهسی اولان پئشمرگه ایله ترور تشکیلاتی پکاکا آراسیندا آرتان گرگینلیک گئتدیکجه چاتیشمالارا چئوریلیر. پکاکانین دوهوکون آمدی بؤلگهسینده پئشمرگهیه باغلی زراوانی قوهلرینه قارشی سالدیریلاری آرتیر.
سون ترور سالدیریلاری نتیجهسینده آغیر ایتکیلرین اولماسی بوتون عراق کورد بؤلگهسل ایدارهسینده هامینین غضبینی آرتیریب، پکاکا ایسه بو ایشده مسئولیت داشیمادیقلارینی بیلدیریر. بئله کی، پکاکا متینادا اونلارین ساحهلرینه گیرمهیه چالیشان پئشمرگه قوهلرینی اویاردیقلارینی، اما سالدیریا گئچمدیکلرینی ادعا ائدیر. آنجاق بوتون علامتلر آچیق بیر شکیلده پکاکانین پئشمرگه قوهلرینی هدفه آلدیغینی گؤستریر. عراق کورد بؤلگهسل ایدارهسینین باشباخانی بارزانی ده سرت شکیلده پکاکانی قینادی.
ایندی گلین بیر آز گئرییه دؤنوب باخاق کی، بو زیگزاگ چکن آددیملار نئجه گلدی. تورکیهنین عراقین قوزئیینده پکاکایا قارشی آرتان عملیاتلاری و پکاکانی سرحد خطیندن گئرییه ایتلهیهرک ایرلیلهمهسی، هفتانین، آواشین-باسیان، متینا کیمی بؤلگهلرده ساحه حاکمیتی یاراداراق یئرلشمهسی، بو مدت بویو پئشمرگهنین ده تورکیه سلاحلی گوجلرینه معین آچیلاردان دستک اولماسی پکاکانی چوخ چتین وضعیتده قویموشدو. ترور هؤرگوتو آغیر ایتکیلر وئرمکله یاناشی، کنترل ائتدیگی بؤلگهلرده ده بؤلونمهیه، منطقهلرینی ایتیرمهیه باشلامیشدی. بو باخیمدان پکاکا آچیق بیر شکیلده پئشمرگهنی هدفه آلاراق بؤلگهدهکی وارلیغینی قوروماغا گئچدی.
نهایت، ترور هؤرگوتو پکاکا بؤلگهدهکی خائوسدان فایدالاناراق بیر چوخ ساحهنی «دفاکتو» ایداره آلتینا آلدی و عراق کورد بؤلگهسل ایدارهسینین نفوذونو دا تانیمایاراق حرکته داوام ائتدی. یالنیز ۷۰۰ دئییل، چوخ کند پکاکانین ایدارهسی آلتینا گئچدی. بو، عراق کورد بؤلگهسل ایدارهسینین، اؤزللیکله ده کادپ مقاملارینین هضم ائده بیلمهدیگی بیر وضعیت ایدی. آنجاق تورکیه سلاحلی گوجلرینین بؤلگهده گوجلو بیر شکیلده پکاکانی هدفه آلماسی کادپیه ده بیر فرصت وئردی و آز-آز دا اولسا، پکاکایا قارشی حرکته گئچدیلر. پئشمرگه - پکاکا مبارزهسینین آرتدیغی بئله بیر شرایطده تورکیهنین تروریزمله مبارزهسینه دستک دورومونون یاراندیغی گؤرونور.