یاخین‌لاشان سئچکی‌لر و ترورلا موباریزه
ستا – سیاست، اقتصادیات و جمعیت آراشدیرما‌لاری فوندونون آراشدیرماچی‌سی جان آجونون "یاخین‌لاشان سئچکی‌لر و ترورلا موباریزه" باش‌لیق‌لی مقاله‌سی...
تورکیه سئچکی تاریخینه یاخینلاشدیغی بیر واختدا پ.کا.کا ترور تشکیلاتی‌نین قوندارما باشچی‌لاری‌نین داوام‌لی اولا‌راق سئچکی‌لرله باغلی آچیقلاما‌لار وئرمه‌لری و اردوغانین قارشی‌سینداکی اتفاق‌لاری دستکلمه‌لری دقت‌لری جلب ائدیر. نتیجه اعتباری ایله سیاسی پروسه لردن چوخ ترور و زوراکی‌لیقلا نتیجه الده ائتمه‌یه چالیشان پ.کا.کا-نین بو یئنی اوسلوبو آلتیندا تشکیلاتین قارشی-قارشییا اولدوغو چیخیلماز یول و دیرناقاراسی رهبرلیک کادری‌نین توکنمیش‌لیگی کیمی گؤرونور.
پ.کا.کا/کا.ج.کا-نین ایجرا کومیته‌سی‌نین عضوو دوران کالکان مطبوعاتا آچیقلاما وئره‌رک، اردوغانین رهبرلیک ائتدیگی حکومتین دئوریلمه‌لی اولدوغونو نوماییش ائتدیریب. اصلینده تورکیه-نین سئچکی تاریخینه آز قالمیش بیر واختدا پ.کا.کا-نین قوندارما یوکسک سویه‌لی آدلان‌دیریلان‌لارین دئمک اولار کی، هامیسی اوخشار بیانات‌لار وئردی‌لر. جمیل باییک، مرات کاراییلان، بئسه هوزات کیمی آدلار آک پارتی-م.ح.پ اتفاقینداکی اقتدارین نه‌ین باهاسینا اولورسا اولسون دئوریلمه‌سی و یئرینه مقبول آلترناتیو یارادیلماسی‌نین واجیب‌لیگینی وورغولادی‌لار. بو چرچیوه‌ده تشکیلات آدیندان بئسه هوزات وئردیگی آچیقلامادا 14 می سئچکی‌لرینین هئچ بیر سئچکییه بنزمه‌دیگینی وورغولاییب، ح.د.پ-نین کمال کیلیچداراوغلونون لئهینه نامیزد ایره‌لی سورمه‌مه‌سینی دوغرو گؤردوگونو و سئچکی‌لر بیتنه قدر “حربی آکسیا‌لاری”نی دایاندیردیق‌لارینی بیان ائتمیش‌دیر. پ.کا.کا/کا.ج.کا ترور تشکیلاتی‌نین وار گوجو ایله سئچکی سوره جی ایله ماراقلانماسی و اردوغانا قارشی موضع توتماسی نه دئمک‌دیر؟ مشروع سیاسی سیستم‌دن، سئچکی پروسه لریندن اوزاق دورما‌لی اولان ترور تشکیلاتی نیه گؤره سیاسی کامپانیا آپارماغا باشلاییب؟
دوران کالکانین وئردیگی سون آچیقلاما پ.کا.کا-نین بو حرکت طرزینی ایضاح ائدیر. دوران کالکان وئردیگی آچیقلامادا: “اردوغان بیزی اؤلدورمک اوچون میت-ی سفربر ائتدی. آدیمیزی سیاهیدا آچیقلاییب‌لار، هر گون اؤلدورورلر، هئچ کیمدن سس چیخمیر. مئدیا مدافعه دایره‌لرینده، باکوردا تونل‌لرده، هر یئرده هوجوما معروض قالیریق. قندیلده، شنگال-دا، روژووادا اؤلدورولوروک. هر گون اؤلدورور. هئچ کیم سسینی چیخارمیر. سیاهی‌لار دوزلتدی‌لر. قیرمیزی سیاهی، ساری سیاهی، یاشیل سیاهی، بوز سیاهی، باشقا سؤزله، هر سیاهییا اوتوز-قیرخ آد قویورلار. شکیل‌لر قویوب‌لار. بون‌لار ائله آختاریلان‌لار سیاهی‌سی دئییل. آچیق-آشکار اؤلدوروله‌جک‌لرین سیاهی‌سی‌دیر" ایفاده‌سیله اصلینده پ.کا.کا/کا.ج.کا-نین نئجه تضییق آلتیندا اولدوغونو، رهبر کادرلارین حرکته کئچه و ایداره ائده بیلمه‌یه‌جک حالا گلدیگینی اورتایا قویدو.
تورکیه-نین سون ایللرده پ.کا.کا ترور تشکیلاتینا قارشی فعال و هرطرف‌لی تضییقی سون ایللرده جدی نتیجه‌لر وئردی. تورکیه-ده دئمک اولار کی، فعالیت‌سیز حالا گتیریلن ترور تشکیلاتی عراق و سوریه-ده سرحدیانی حربی عملیات‌لارلا موضع لرینی ایتیرمکده‌دیر. آنجاق دوران کالکانین دا دیله گتیردیگی و وورغولادیغی باشقا بیر موباریزه اصولونو ایسه میت داوام ائتدیریر. میت-ین یئنی تهلوکه‌سیزلیک دوکترینی چرچیوه سینده پ.کا.کا قوندارما لیدرلیک کادرلارینی لغو ائتمک اوچون باشلاتدیغی محو ائتمه پروسه سی 2015-جی ایلدن بری 500-ا یاخین آدین ضررسیزلشدیریلمه‌سینه ایمکان یاراتدی. بونون دا تشکیلاتین فعالیت ایستیقامتینده جدی دییشیک‌لیگه سبب اولدوغو گؤرونور. دوران کالکانین آوریلین 18-ده وئردیگی آچیقلاما‌لارین دا تصدیقلدیگی کیمی، حرکت و اونسیت باجاریق‌لاری جدی شکیلده زده‌لنن تشکیلات رهبرلیگی‌نین توکنمیش‌لیگی‌نین اولدوغونو حساب ائتمک دوزگون اولاردی.
بو چرچیوه ده پ.کا.کا/کا.ج.کا ترور تشکیلاتی‌نین سؤزده لیدرلری قارشی-قارشییا اولدوق‌لاری چیخماز یول‌دان خلاص اولا بیلمه‌لری اوچون سئچکی‌لری تاریخی فورصت کیمی گؤرورلر. اونلار حسابلاییرلار کی، اردوغانین دئوریلمه‌سی ایله ترورا قارشی قطعیتلی موضع ضعیفله‌یه‌جک، تورکیه-نین عراق و سوریه-ده حربی عملیات‌لاری دایان‌دیریلا‌جاق، حقوقی ایستروکتورلاری اولان ح.د.پ/ی.س.پ ایسه گوج‌لنه‌جک و اؤلکه‌نین دوغو بؤلگه‌لرینده اؤزلرینه یئر آچا‌جاق.
حالبوکی، ترورلا موباریزه تورکیه اوچون سیاست‌دن کنار میللی تهلوکه‌سیزلیک مسئله‌سی‌دیر. پ.کا.کا-نین یوخ اولماق عرفه‌سینده اولدوغو حالدا، مؤوجود تهلوکه‌سیزلیک دوکتریناسی قطعیت ایله داوام ائتدیریلمه‌لی‌دیر.
