تورک مطبخی (50)
زرده/ ساری شیله دسری
تورک مطبخی (50)
یایین تاریخی 10-16 دسامبر 2019
ت.ر.ت تورکیهنین سسی رادیوسوندا، تورک مطبخی پروقرامیندان سلاملار.
تورک یئمک مدنیتینه دایر قیسا معلوماتلار وئرمک، تورک مطبخیندن تعریفلر وئریریک بو پروقرامدا.
بو گون سیزلره عثمانلی سارای مطبخینه عایید اولوب، ایندیکی واختدا سئیرک ده اولسا پیشیریلمهیه داوام ائدیلن بیر شیریندن سؤز ائدجگیک.
دوگو ایله پیشیریلن و لذتینی ادویات اولاراق ایستیفاده ظفران و ساریکؤکدن آلانن بو شیرینین آدی؛ "زرده/ ساری شیله/ دسری". عثمانلی زامانیندا اوّللر بیر ماتم یئمگی اولاراق بیلینن "زرده"، سونرالار سونّتلرده، تویلاردا و ظفر قوتلامالارینداکی کیمی اؤزل گونلرده سرویس ائدیلمهیه باشلاییر و بیر قوتلاما شیرنیسینه چئوریلر. زردهنین بو دؤورلرده بو قدر سئویلمهسینین سببی ایسه ظفرانین گونشه و آلتینا بنزهین گؤزل ساری رنگی اولور. ظفران باهالی اولماسی سببیله ایندیکی واختدا اولدوقجا خرجلی بیر شیرنیه چئوریلن زرده یالنیز سارکؤک ایستیفاده ائدهرک حاضیرلاماق دا مومکون. اما بیز یئنه ده اوریژینال تعریفه صادق قالمانیزی مصلحت گؤروروک.
ائوده، گول سویوندا دملهدیغینیز ظفران آروماسییلا لذتلندیردیغینیز گئرچک زردهنین دادینین تام فرقلی اولاجاغیندان امین اولا بیلرسینیز.
ایندی زرده پیشیرمک اوچون لازیم اولان مسایللریمیز سایاق؛
1 ایستکان دوگو
2 لیتر سو
1/2 کیلوقرام شکر یا دا
1.5 سو ایستکانی بال
2 قاشیق مکه نیشاستاسی
1/2 ایستکان گول سویو
1 قرام ظفران
1/2 چای قاشیغی ساری کؤک
بزمک اوچون؛ 30 قرام قوش اوزومو
30 قرام شام فیستیغی
سیرا گلدی زردهنی پیشیرمهیه.
اولجه ظفرانی بیر گئجه اوّلدن گول سویونون ایچریسینده آغزی قاپاقلی بیت قابدا دمه بوراخین. قوش اوزوملرینی یویوب، آریدین و یومشالیب شیشمهلری اوچون بیر مدت سودا گؤزلدین. بو آرادا دوگونو یویون و 2 لیتر سودا یوموشایانا قدر قاینادین. نیشاستانی یاریم ایستکان سودا اریدیب هاشلانماقدا اولان دوگونون ایچینه قاریشدیراراق تؤکون. شکری یا دا بالی، ظفرانلی گول سویونو و ساری کؤکو ده قازانا علاوه ائدین. داواملی قاریشدیراراق بیر ایکی داشیم قاینادین. قایناماغا باشلادیقدان سونرا آتشی قیسین و زردهنین سیخلاشماسی اوچون بیر آز داها پیشیرین. پیشن زردهنین آتشدن آلیب آلتی کاسایا برابر اولاراق پایلاشدیرین. سویودوقدان سونرا ارده اوزرینی قوش اوزومو و شام فیستیغی ایله سوسلهیهرک سرویس ائدین. نوش اولسون!
تورک مطبخی پروقرامیندا بو گون سیزلره عثمانلی سارای مطبخیندن بیر شیرین اولان "زرده" تعریفی وئردیک.
بیر باشقا پروقرامدا بیر باشقا تورک لذتیله گؤروشمک اوچون ساغلیقلا قالین.