دونیادا ایز بوراخان تورک بؤیوکلری (10)
سئوگیلی اوخوجولار!
بو هفتهکی پروگرامدا، ادبیات دالیندا نوبل اؤدولو قازانان ایلک تورکیه جمهوریتی وطنداشی، مشهور یازار اورحان پاموق حاقیندا سیزلره بیلگی وئرمهیه چالیشاجاغیق.
شبههسیز دونیا ادبیاتی و یا تورکیه جمهوریتی ایله ماراقلانان دینلهییجی و اوخوجولاریمیزین چوخو اورحان پاموقون آدینی ائشیتمیشدیر. چونکو 12 اکتبر 2006 تاریخینده نوبل اؤدولو قازانان بو استعدادلی یازارین اثرلری دونیانین بیر چوخ دیلینه چئوریلمیش و چئشیدلی فعالیتلرله تانیدیلمیشدیر.
اورحان پاموق ایستانبول دوغوملودور . 7 ژوئن 1952ده زنگین و یوکسک ائییتیملی بیر عائلهده حیاتا گؤزلرینی آچان اورحانین آتاسی گوندوز پاموق، تورکیه جمهوریتینین ایلک مهندسلریندن و اوزون مدت اولوسلارآراسی بؤیوک بیر فیرمانین تورکیهده باش مودورویدو. آناسی شکوره خانیم ایسه، عثمانلی دؤورونده گیریت والیلیگینی ائتمیش اولان ابراهیم پاشانین تورونلارینداندی .
اورحان پاموق اوزون ایللر هانسی ساحهده ائییتیم آلاجاغی، هانسی ساحهده چالیشاجاغی قونوسوندا قرارسیزدی. سوناوخولو ایستانبولدا بیر آمریکا اوخولوندا اوخویان پاموق، ایگیرمی ایکی یاشینا قدر رساملیق خیالیله یاشایاراق، اؤزونو تامامیله رسیم چئکمهیه آدامیشدی. سوناوخول دؤنمینین آردیندان ایستانبول تکنیک اونیورسیتهسینده معمارلیق بؤلومونده 3 ایل تحصیل گؤردوکدن سونرا یاریدا بوراخیب ایستانبول اونیورسیتهسی قازئتهچیلیک بؤلومونده داوام ائدن پاموق، یئنه باشاریلی اولابیلمهیهجیینی آنلایینجا او ایشی سئچمکدن ده وازگئچمه قراری آلدی. آنجاق بو باشاریسیزلیقلار، بؤیوک بیر باشلانقیجین خبرچیسی ایدی. ایگیرمی اوچ یاشیندان اعتباراً رومان یازماغا باشلایان گنج پاموق، بو قونودا اؤزونه گوونمهیه باشلامیشدی. بونا گؤره ده اؤزونه ائوینه قاپاداراق رومان یازماغا داوام ائتدی. ایلک رومانی جؤودت بی و اوغوللاری آدییلا 1982ده یاییملاندی. زنگین بیر تورک عائلهسینین اوچ قوشاغینین حکایهسینی ایچرن بو رومان، "اورحان کمال" و "میلیت" رومان اؤدوللرینی قازاندی. بیر ایل سونرا اورحان پاموقون سسسیز ائو آدلی ایکینجی رومانی یاییملاندی. بو رومانین فرانسیزجایا چئوریلمسیله اورحان پاموقون آدی یورددیشیندا دا ایشیدیلمهیه باشلادی. آنجاق پاموقا اولوسلارآراسی اون/شهرت قازاندیران اثری 1985ده یاییملانان آغ قالا رومانی اولدو. بو اثر قیسا مدتده بیر چوخ دیله چئوریلدی. شهرتی سرحدلری آشمیش اولان پاموق 1985-1988جی ایللر آراسیندا آمریکادا کلمبیا اونیورسیتهسینده "قوناق عالیم" اولاراق چالیشدی. او عینی زاماندا رومان یازماغا داوام ائدیردی. بیر وکیلین ایستانبولداکی گوندهلیک حیات حکایهسینی ایچرن قارا کیتاب آدلی رومان 1990دا تورکیهده یاییملاندی. بو رومان دا فرانسیزجایا چئوریلدیکدن سونرا اورحان پاموقا اؤدول قازاندیردی.
اورحان پاموقون 1994ده یاییملانان یئنی حیات آدلی رومانی، تورکیهده ادبیات ساحهسینده ان چوخ اوخونان کیتابلار آراسینا گیرمهیی باجاردی. او، منیم آدیم قیرمیزی آدلی رومانیندا (1998) فرقلی بیر عشق و عائله حکایهسینی آنلادمایا چالیشدی. بو اثر ده، اؤزللیکله یورددیشیندا رغبت گؤرهرک اؤنملی قورولوشلار طرفیندن اؤدوللندیریلدی.
اورحان پاموق وئردیگی رپورتاژلاردا هر نه قدر سیاسته قاریشمادیغینی سؤیلهسه ده، 2002ده یاییملادیغی قار آدلی رومانییلا "سیاسی رومان" دئییلهبیلهجک بیر اثر اورتایا قویدو. آیریجا یازمیش اولدوغو ادبی- مدنی یازیلاریندان بعضیلرینی ده اؤتهکی رنگلر (1999) آدییلا یاییملاندی.
آمریکادا یاشادیغی اوچ ایل دیشیندا حیاتینی ایستانبولدا گئچیرن، هله دوغولدوغو بینادا یاشایان اورحان پاموقون سون رومانی دا ایستانبول آدینی داشیییر. یازار بو اثرینده گنجلیک چاغینین آنیلارییلا بیرلیکده، ایستانبولون محتشم گؤزللیکلرینی ده کیتابا علاوه ائتدیگی فوتوشکیللرله زنگینلشدیرهرک اوخوجولارینا تقدیم ائتمیشدیر.
اورحان پاموق، آمریکادا یاییملانان تایم درگیسینین 8 می 2006 تاریخلی ساییسینین "تایم 100: دونیامیزی شکیللندیرن شخصیتلر" باشلیقلی قاپاق یازیسیندا، تانیدیلان 100 آدامدان بیری اولدو. 2007 میینده 60.جی کن فیلم فستیوالیندا ژوری اویهسی اولان، اثرلری اونلارجا دیله چئوریلمیش اولان اورحان پاموق، 2006دا آلدیغی نوبل اؤدولو ایله، یالنیز اؤز اثرلرینی دئییل، تورک ادبیاتینین باشقا محتشم اثرلری و بؤیوک یازارلارینین اوخونماسی و داها چوخ تانینماسینا دا وسیله اولموشدور.
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی