ارمنیستانین قونشو دؤولتلر ایله ایلیشکیلری
تورکیه و آذربایجانین بیرلیکده تکلیف ائتدیگی بؤلگهسل آلتیلی پلتفورم بوتون ایلگیلی طرفلرین فایداسینادیر
۱۸ آگوست ۲۰۲۱ تاریخینده ارمنیستان باشباخانی نیکول پاشینیان، حکومتینین ۵ ایللیک پلانینی آچیقلارکن خاریجی سیاستده قونشولارییلا یاخین امکداشلیق اینکیشاف ائتدیرهجکلرینی بیلدیردی. آردیندان بیر تلویزیون کانالیندا دانیشان باشباخان پاشینیان، اؤن شرطلر اولمادان تورکیه جمهوریتی ایله ایلیشکیلری نورماللاشدیرماغا حاضر اولدوغونو دیله گتیردی. نیکول پاشینیانا گؤره، ارمنیستان ایله تورکیه آراسیندا دیپلوماتیک ایلیشکیلرین اولماماسی، سرحدلرین باغلی اولماسی بؤلگهسل ثابتلیک و باریشا منفی تأثیر ائدیر.
باشباخان پاشینیانین بو جور آچیقلاما وئرمهسی غفلتاً گرچکلشن بیر حادثه دئییلدی. هر کسین معلومو اولدوغو اوزره، نیکول پاشینیان باتی ایله یاخینلاشما وعدی ایله اقتدارا گلمیشدی. باتی ایله یاخینلاشماق ایسه گورجوستان و تورکیه ایله ایلیشکیلری اینکیشاف ائتدیرمکدن گئچیر. پاشینیانین لیدئرلیک ائتدیگی وطنداش آنلاشما پارتیسی قونشولارییلا یاخشی ایلیشکیلر میدانا گتیرمه نیتینی اولدن دیله گتیریردی. عمومی سئچیم مدتینده نیکول پاشینیانین قرارگاهلاری تورکیه ایله ایلیشکیلری گؤزدن گئچیرهجکلرینی آچیقجا ایفاده ائتمیشلر ایدی.
۲۰ ژوئن ۲۰۲۱ تاریخینده ائدیلهن عمومی سئچیملری قازانان اقتدارداکی وطنداش آنلاشما پارتیسینین حکومت قورماق اوچون کوالیسیونا احتیاج دویماماسی، نیکول پاشینیانین قونشو دؤولتلرله ایلیشکیلرینی نورماللاشدیرماسی اوچون ایمکان وئریر. ارمنی خالقی قاراباغدا مغلوبیت آلماسینا باخمایاراق، پاشینیانی اقتدارا داشییاراق اونون قونشولار ایله ایلیشکیلری دوزلدجییک سؤزونو دستکلدیکلرینی اورتایا قویدوقلارینی سؤیلهیه بیلریک.
۲ آگوست ۲۰۲۱ تاریخینده نیکول پاشینیان یئنیدن باشباخان سئچیلدی. داوام ائدن گونلرده یئنی کابینه دقیقلشدیریلرکن خاریجی ایشلر باخانی ان سون تعیین اولونان کیمسه اولدو. باشباخان نیکول پاشینیانا یاخینلیغییلا بیلینهن آرارات میرزویانین خاریجی ایشلر باخانی اولاراق تعیین ائدیلمهسی اوزرینه بعضی دایرهلر، "او دیپلومات منشألی بیری دئییل" تنقیدینی دیله گتیردیلر. باشباخان پاشینیان بلکه خاریجی سیاستده ازبرلری پوزان آددیملاری آتماق اوچون یولداشی آرارات میرزویانی بو وظیفهیه گتیرمیش اولابیلر. خاریجی ایشلر باخانی آرارات میرزویان تورکیهنی یاخشی تانییان و باتی یانلیسی بیری اولاراق بیلینیر.
۴۴ گون داوام ائدن قاراباغ ساواشیندان سونرا روسیا، آذربایجان و ارمنیستان طرفیندن یارادیلان اوچلو کمیسیون بیر نئچه آیلیق اوزلاشمازلیق دؤوروندن سونرا یئنیدن ایشلرینه باشلادی. بو وضعیت، پاشینیان حکومتینین قونشولاری، اؤزللیکله تورکیه ایله ایلیشکیلرینی نورماللاشدیرماغا مثبت باخدیغینا ایشاره ائدیر. سؤز قونوسو اوچلو کمیسیون بیر چوخ مسئلهنی دانیشیر. اما زنگهزور کوریدورو پروژهسی بو مسئلهلرین ان اؤنملیلریندن بیریدیر.
ارمنی سیاستینده گوج ایتیرهن قاراباغ کلانی بو سورهجی آخساتماق اوچون الیندن گلهنی ائتمهیه چالیشاجاق. آنجاق ارمنیستان ایچ سیاستینده عقل سلیمین غالیب گلهجگینه اینانیریق.
تورکیه و آذربایجانین بیرلیکده تکلیف ائتدیگی بؤلگهسل آلتیلی پلتفورم بوتون ایلگیلی طرفلرین فایداسینادیر. ارمنیستانین اینکیشافی قونشولارییلا ایلیشکیلرینی اینکیشاف ائتدیرمهسینه باغلی. تورکیهنین روسیا ایله مؤوجود ایلیشکیلری گونئی قافقازدا امکداشلیغین اینکیشاف ائتدیریلمهسینه اویغون زمین حاضیرلاییر. بو جور سببلر پاشینیان حکومتینی خاریجی سیاستده جدی آددیملار آتماغا جسارتلندیرمیش اولابیلر.
آوراسیا گوندمی - 87
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی