جمهورباشقانی اردوغانین اوکراینا سفری
اوکراینا جمهورباشقانی زلنسکی، تورکیه جمهورباشقانی اردوغانی مارینسکی ساراییندا رسمی مراسیمله قارشیلادی
۳ فوریه ۲۰۲۲ تاریخینده تورکیه جمهورباشقانی رجب طیب اردوغان، اوکراینا جمهورباشقانی ولادیمیر زلنسکینین دعوتی اوزرینه تورکیه-اوکراینا یوکسک سویهلی استراتژیک شوراسینین اونونجو ییغینجاغینا قاتیلماق اوچون کیئوه گئتدی. جمهورباشقانی اردوغان، رسمی گؤروشمهلری اولینده اوکراینانین باشکندی کیئوده ۲.جی دونیا ساواشیندا اؤلنلرین خاطرهسینه تیکیلن مجهول عسگر آنیدینا چلنگ قویدو.
اوکراینا جمهورباشقانی زلنسکی، تورکیه جمهورباشقانی اردوغانی مارینسکی ساراییندا رسمی مراسیمله قارشیلادی. رسمی قارشیلاما مراسیمینین آردیندان ایکی اؤلکهنین لیدئرلری باش باشا گؤروشدو. تخمیناً ۳ ساعات ۱۰ دقیقه داوام ائدن باش باشا گؤروشمه سونراسی ایکی لیدئر هئیتلریله تورکیه-اوکراینا یوکسک سویهلی استراتژیک شوراسینین اونونجو ییغینجاغینی گرچکلشدیردی. شورا توپلانتیسیندا تورکیه ایله اوکراینا آراسینداکی مؤوجود امکداشلیق؛ سیاست، اقتصاد و تیجارت، ساوونما، مدنیت ساحهلریندهکی گلیشمهلر اله آلیندی. توپلانتینین آردیندان ایکی لیدئرین حضوروندا حکومتلرآراسی ۸ آنلاشما ایمضالاندی. ایمضالانان آنلاشمالارین آراسیندا تورکیه-اوکراینا سربست تیجارت آنلاشماسی دا وار. بیلیندیگی اوزره، اوکراینا ایله تورکیه آراسیندا سربست تیجارت بؤلگهسینین قورولماسینا باغلی مذاکیرهلر ۲۰۱۱.جی ایلده باشلامیشدی.
اوکراینا جمهورباشقانی زلنسکی، جمهورباشقانی اردوغان ایله تشکیل ائتدیگی اورتاق مطبوعات کنفرانسیندا سربست تیجارت آنلاشماسینین اؤنمی اوزرینده دوراراق، "آنلاشما ایمضالانمادان اول گئچدیگیمیز ایلده اورتاق تیجارت حجمیمیز ۷ میلیارد دلارا یوکسهلهرک یئنی بیر رکورد قیردی. بو دا ۱۰ میلیارد دلارلیق هدفیمیزین، ایستهگیمیزین ممکن اولدوغونو گؤستریر. سربست تیجارت آنلاشماسی دا بو هدفه ایستهدیگیمیزدن داها قیسا مدتده چاتمامیزی تامین ائدجک" دئدی. جمهورباشقانی اردوغان، سفر دؤنوشونده اوچاقدا ژورنالیستلره وئردیگی آچیقلامادا، اوکراینا ایله دیپلوماتیک ایلیشکیلرین قورولماسینین ۳۰.جو ایلدؤنومونده ۸ آنلاشما امضالادیقلارینی ایفاده ائدرک، "مذاکیرهلری ۱۱ ایلدیر سورهن اؤزللیکله سربست تیجارت آنلاشماسی چوخ چوخ اؤنملی و معنالی ایدی" دگرلندیرمهسینی وئردی.
جمهورباشقانی اردوغانین اوکراینا سفرینده تورکیه حکومتی ایله اوکراینا حکومتی آراسیندا ایمضالانان بیر باشقا اؤنملی آنلاشما دا، ایرلی تکنولوژیلر، هاواچیلیق و اوزای ساحهسینده امکداشلیق چرچیوه آنلاشماسیدیر. بو آنلاشما چرچیوهسینده ۲۰۳۵.جی ایله قدر تورک سرمایهلرینه قوروملار وئرگیسی، علاوه دگر وئرگیسی، گؤمروک وئرگیسی استثنالاری تامین ائدیلهجک و تورک شیرکتلرینین ایرلی تکنولوژی، هاواچیلیق و اوزای ساحهسینده اوکراینادا ائدجکلری سرمایهلره اؤزل تشویقلر وئریلهجک. اوکراینا جمهورباشقانی زلنسکی، اورتاق مطبوعات کنفرانسیندا ائتدیگی دانیشماسیندا، سؤزو گئدن آنلاشمانین تورک انسانسیز هاوا آراجلارینین (ایها) اوکرایناداکی اورهتیمینی گئنیشلهدهجگینی وورغولادی.
*
تورکیه جمهورباشقانی رجب طیب اردوغانین اوکراینا سفری، روسیا ایله اوکراینا آراسیندا آرتان گرگینلیگین دوشورولمهسی و قارادنیزده باریشین تامینی باخیمیندان دا بؤیوک اؤنمه صاحب. اردوغان، اورتاق مطبوعات کنفرانسیندا، "تورکیه، قارادنیزدن قونشو اولدوغو ایکی دوست اؤلکه آراسینداکی بحرانین سونلاندیریلماسی اوچون اوزرینه دوشهنی ائتمهیه حاضردیر. لیدئرلر سویهسینده بیر ذیروهیه یا دا تکنیک سویهده گؤروشمهلره ممنونیتله ائو صاحبلیگی ائدهبیلهجگیمیزی بو گونکو گؤروشمهلریمیزده بیر دفعه داها وورغولادیم" دئدی. اوکراینا جمهورباشقانی زلنسکی، "ساواشی بیتیرمه یولوندا، اوکراینا-روسیا آراسیندا آراچی اولما گیریشیمی اوچون" جمهورباشقانی اردوغانا تشکر ائتدی.
اوکراینا سفری دؤنوشو ژورنالیستلره دانیشان جمهورباشقانی اردوغان، روس لیدئر ولادیمیر پوتین ایله گؤروشمهسینی تورکیهده ائتمهسی یولوندا اوکراینا جمهورباشقانی ولادیمیر زلنسکی ایله گؤروش بیرلیگینه واردیقلارینی دیله گتیردی.
آیریجا اوکراینا سفرینده جمهورباشقانی اردوغان، اوکراینا دؤولت باشقانی زلنسکی ایله قیریم تاتارلارینین وضعیتینی دگرلندیردی و اونلارا دایر اورتاق پروژهلری گؤزدن گئچیردی. اردوغان، اورتاق مطبوعات کنفرانسیندا ائتدیگی دانیشماسیندا، قیریم دا داخیل اولماق اوزره، اوکراینانین اگمنلیگینی و تورپاق بوتونلوگونو دستکلهمهیه داوام ائتدیکلرینی وورغولادی.
سون اولاراق،قیریم تاتار تورک خالقینین میللی لیدئری و اوکراینا میللت وکیلی مصطفی عبدالجمیل قیریماوغلو جمهورباشقانلارینین اورتاق مطبوعات کنفرانسینا و هئیتلر آراسی گؤروشمهسینه ده قاتیلدی. آیریجا قیریماوغلو و برابریندهکی قیریم تاتار هئیتی بوریسپیل هاوالیمانیندا جمهورباشقانی اردوغان طرفیندن قبول ائدیلدی.
آوراسیا گوندمی - ۲۴
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی