توکایئوین روسیا سفری
"قازاقیستان، اؤلکه‌ده‌کی آغیر وضعیتدن سوءایستیفاده ائد‌ن بعضی اولوسلارآراسی چته‌لرینین قوربانی اولدو"
قازاقیستان جمهورباشقانی قاسم جومرد توکایئو، ۱۰-۱۱ فوریه ۲۰۲۲.جی ایل تاریخلرینده روسیا فدراسیونونا رسمی سفر ائتمیشدی. توکایئو ۱۰ فوریه‌ده موسکوادا روسیا جمهورباشقانی ولادیمیر پوتینله گؤروشدو. ایکی لیدئر ژانویه آییندا قازاقیستان‌دا باش وئرمیش حادثه‌لری و روسیا ایله قازاقیستان آراسیندا اقتصاد و تیجارت، تحصیل، انرژی و اوزای آراشدیرمالاری ساحه‌لرینده امکداشلیغی مذاکیره ائتدی.
ولادیمیر پوتین، ژانویه حادثه‌لری ایله باغلی دگرلندیرمه‌لر وئررکن، "قازاقیستان، اؤلکه‌ده‌کی آغیر وضعیتدن سوءایستیفاده ائد‌ن بعضی اولوسلارآراسی چته‌لرینین قوربانی اولدو" دئدی و روسیا کولکتیو گوونلیک آنلاشما‌سی هؤرگوتونون ۴.جو ماده‌سینه اساساً قازاقیستانا "دستک اولدوغونو" خاطیرلاتدی. آیریجا پوتین توکایئوه: "بو حادثه‌لر زامانی گؤروله‌ن زیانین آرادان قالدیرماسی اوچون چوخ چابا گؤستریلمه‌لی اولدوغونو بیلیرم. بونونلا بئله، قازاقیستان سایه‌نیزده آیاقلاری اوسته دورور و گلیشیر" دئدی.
قازاقیستان جمهورباشقانی توکایئو، ژانویه حادثه‌لری ایله باغلی تحقیقاتین داوام ائتدیگینی بیلدیررک، "تأسف کی، چوخلو اینسان حیاتینی ایتیردی و من ده بوندان قایغیلییام. حیاتینی ایتیره‌نلرین عائله‌لرینه و یاخینلارینا باش‌ساغلیغی وئردیم. هر اولقویا آیری آیری باخیلیر. سوچلو اولانلار معین ائدیله‌جک، جزالاندیریلاجاق" دئدی. آیریجا توکایئو، اؤلکه‌نین استراتژیک تاسیسلرینین قورونماسی و تروریستلره قارشی پسیکولوژیک چکیندیرمه آچیسیندان کولکتیو گوونلیک آنلاشما‌سی هؤرگوتو باریش گوجلرینین اؤنملی رول اوینادیغینی وورغولادی.
گؤروشمه سیراسیندا روسیا لیدئری پوتین روسیانین قازاقیستانین ان بؤیوک تیجارت و اقتصاد اورتاغی اولماسیندان ممنون اولدوغونو، ۲۰۲۱.جی ایلده ایکیلی تیجارت حجمینین یوزده ۳۴ آرتاراق ۲۵،۶ میلیارد دلارا چاتدیغینی و بونون چوخ یاخشی بیر گؤستریجی اولدوغونو وورغولادی.
گؤروشمه‌دن سونرا ایکی لیدئر تحصیل، نوکلئر انرژی ساحهسینده متخصص یئتیشدیرمه، دیجیتاللاشما و اوزای آراشدیرمالارینا دایر ۱۰ آنلاشما مموراندومو و دمیر یولو نقلیاتی ساحهسینده امکداشلیق حاقیندا آنلاشما ایمضالادیلار.
قازاقیستان جمهورباشقانی قاسم جومرد توکایئو، روسیا جمهورباشقانی ولادیمیر پوتینله تشکیل ائتدیگی اورتاق مطبوعات توپلانتیسیندا، قازاقیستان‌دا باومان موسکوا دؤولت تکنیک بیلیم‌یوردو کیمی روسیانین مشهور اونیورسیته‌لرینین شعبه‌لرینین قازاقیستان‌دا آچیلاجاغینی دیله گتیردی.
*
قازاقیستان جمهورباشقانی توکایئو، روسیا فدراسیونونا سفری چرچیوه‌سینده ۱۱ فوریه ۲۰۲۲ده تاتاریستانا گئتدی. قازاقیستان جمهورباشقانی قاسم جومرد توکایئوی، قازان اولوسلارآراسی هاوا لیمانیندا تاتاریستان جمهورباشقانی رستم میننیخانوو قارشیلادی. توکایئو و میننیخانوو مشهور قازان کرملینینده‌کی قول شریف مسجدینی و جامع کلیسه‌سینی زیارت ائتدیکدن سونرا رسمی گؤروشمه گرچکلشدیردیلر. ایکی لیدئر قازاقیستان ایله تاتاریستان آراسیندا مد‌نی، تیجاری و اقتصادی امکداشلیغین گلیشدیریلمه‌سی یوللارینی مذاکیره ائتدی.
گؤروشمه‌نین سونوندا تاتاریستان جمهورباشقانی میننیخانوو، قازاقیستان جمهورباشقانی توکایئوه تاتار-قازاق امکداشلیغینین گلیشمه‌سینه و ایکی خالق آراسیندا دوستلوغون گۆجلندیریلمه‌سینه قاتقیلاریندان دولایی دوستلوق نیشانی تقدیم ائتدی.
بوندان باشقا، توکایئو تاتاریستان‌داکی تات‌نفت شیرکتینه ده گئتدی. روسیا فدراسیونونون ان بؤیوک نفت و طبیعی گاز شیرکتلریندن بیری اولان تات‌نفت ایله «قازمونای‌گاز» (قازاقیستان نفت و طبیعی قاز شیرکتی) آراسیندا نفت یاتاقلارینی آراشدیرما و ایشلتمه ساحهسینده باورتاق پروژه‌لری گلیشدیرمه‌یه دایر آنلاشما و یول خریطه‌لری ایمضالاندی.
اؤزتله، قازاقیستان جمهورباشقانی قاسم جومرد توکایئوین روسیا فدراسیونونا سفری وئریملی گئچدی.
آوراسیا گوندمی – ۲۵
ایلگیلی‌لی خبرلر
آورآسیا جمهوریتلرینین گۆندمینده‌کی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیه‌یه رسمی سفر گئرچکلشدیردی
