روسیا - باتی بحرانی داوام ائدیر

۱۷-۱۸ فوریه ۲۰۲۲ده اوکراینانین دوغو ویلایتلرینده گرگینلیک آرتدی. روسیا و اوکراینا آتیشماد ایله باغلی بیر بیرینی سوچلادیلار. آوروپا گوونلیک و امکداشلیق تشکیلاتی سون گونلرده آتیش‌کس رژیمینین پوزولماسی حاللارینین چوخ آرتدیغینا دقت چکدی. یئرلی اهالی روسیایا سیغینماغا باشلادی. ۱۹ فوریه‌ده روسیا پرزیدنتی ولادیمیر پوتین و بلاروس پرزیدنتی آلکساندر لوکاشنکو نوکلئر اوچلویو گوجلرینین یئر آلدیغی گئنیش مقیاسلی مانورو ایزله‌دیلر. عینی گون آمریکا پرزیدنتی جو بایدن اوکراینا بحرانی ایله باغلی دانیشاراق، پوتینین اوکراینانی ایشغال ائتمک قرارینا گلدیگینه ایناندیغینی آچیقلادی. ایندی ایسه سؤزوگئدن بحرانلا باغلی سون هفته‌ده باشقا نه‌لرین باش وئردیگینه گؤز آتاق.

۱۵ فوریه ۲۰۲۲ده آلمانیا باشباخانی اولاف شولز، کیئودن سونرا موسکوایا گئتدی. موسکوادا گئچیریله‌ن ایلک پوتین-شولز گؤروشمه‌سیندن آنلاشما چیخمادی.

عینی گون روسیا دؤولت دوماسی پرزیدنت ولادیمیر پوتینی روسیا یانلیسی آیریلیقچیلار طرفیندن تک طرفلی اولاراق باغیمسیزلیغی اعلان ائدیلن دونتسک و لوهانسک خالق جمهوریتلرینی تانینماسی اوچون پوتینه چاغری ائدیلمه‌سینی احتیوا ائدن لایحه‌نی قبول ائتدی.

اوکراینا پرزیدنتی ولودیمیر زلنسکی ده ۱۴ فوریهده خالقا مراجعت ائد‌رک، باتیین "روسیانین سالدیراجاغی گون" اعلان ائتدیگی ۱۶ فوریه‌نی "بیرلیک گونو" اعلان ائتدی. ۱۶ فوریه‌دن اؤنجه بعضی اوکراینالی زنگینلرین و میللت وکیللرینین اؤلکه‌نی ترک ائتدیگی اورتایا چیخدی. آمریکا، استرالیا، اینگیلتره، کانادا کیمی اؤلکه‌لر اوکرایناداکی ائلچیلیکلرینی گئچیجی اولاراق کیئودن لویوه داشیماغا قرار وئردیلر.

۱۵ فوریه ۲۰۲۲.جی ایلده روسیا ساوونما باخانلیغی اؤلکه‌نین باتیسیندا داوام ائد‌ن حربی مانورلارین بعضیلرینین باشا چاتدیغینی آچیقلادی. ناتو باش کاتیبی استولتنبرگ، اتفاقین دوغو‌داکی حربی وارلیغینی گوجله‌ندیره‌جکلرینی بیلدیردی. اوکراینا حکومتی باتیلی اورتاقلارین ایندیه دک کیئوه ۱،۵ میلیارد دلار حربی یاردیم ائتدیگینی آچیقلادی.

۱۷ فوریه‌ده روسیا خاریجی ایشلر باخانلیغی، اوکراینانین ناتویا عضو اولماسی حالیندا، قیریمی گوج یولو ایله گئری آلماق تهلوکه‌سی یاراناجاغینی و بونون ناتو ایله روسیا آراسیندا بیرباشا سلاح‌ی چاتیشمایا سبب اولاجاغینی بیلدیردی. عینی گون آمریکانین موسکواداکی ائلچیلیگینین ائلچی کؤمک‌چیسی بارت گورمانین سینیردیشی ائدیلدیگی آچیقلاندی.

آمریکادا کونگره‌یه سونولان لایحه‌ده روسیانین ان آز اوچ ان بؤیوک بانکینا قارشی تحریملرین تطبیقی تکلیف ائدیلدی. روسیانین مالیه باخانی آنتون سیلوانوو یئنی تحریملرله اؤلکه‌نین سوئیفت‌دن چیخاریلماسی احتیمالینا قارشی تدبیرلر گؤردوکلرینی آچیقلادی. سیلوانوو، باتی اؤلکه‌لری روسیانی تحریملرله هدفه آلیرسا، موسکوا دا انرژی قایناقلارینین یولونو دییشمه‌یه حاضردیر، آنجاق آیرینتیلاری آچیقلامادی.

*

۲۱ فوریه ۲۰۲۲ده روسیا پرزیدنتی ولادیمیر پوتین اوکراینانین دوغوسوندا روسیای یانلیسی آیریلیقچیلارین قوندارما یؤنتیملرینین تانینماسی حاقیندا فرمان ایمضالادی. عینی گون ناتو باش کاتیبی استولتنبرگ روسیانین اوکرایناداکی آیریلیقچی حکومتلری تانیماق قرارینی قینادی. ۲۲ فوریه ۲۰۲۲.جی ایلده آوروپا بیرلیگینین خاریجی ایلیشکیلر و گوونلیک سیاستی یوکسک نماینده‌سی جوزپ بورل روسیانین سؤزوگئدن قرارینین اولوسلارآراسی حقوقا ضد اولدوغونو وورغولادی. ۲۲-۲۳ فوریهده آمریکا، آوروپا بیرلیگی، استرالیا و ژاپن، روسیایا قارشی تحریملر تطبیق ائد‌جکلرینی بیلدیردیلر. اوکراینادا  اولاغان اۆستو حال اعلان ائدیلدی.

باش وئره‌نلردن گؤروندوگو کیمی، اوکراینا ایله باغلی روسیا-باتی چکیشمه‌سی تهلوکه‌لی شکیلده داوام ائدیر. هله‌لیک دانیشیقلاردان هئچ بیر اومودوئریجی نتیجه الده اولونمادی. بحرانین حلی اوچون فرقلی یاناشیم گلیشدیریلمه‌سی لازیمدیر. بلکه ده تورکیه فرقلی یاناشیم سرگیله‌ییب ایکی قارداش خالقین فاجعه‌یه سوروکله‌نمه‌سینین قارشیسینی آلاجاق.